Gula 61
Usa ka adlaw sa dili pa ang pormal nga pagbukas sa klase, mibalik na ko sa Tagbilaran aron ikapahimutang ang akong mga gamit. Gikuyogan ko ni Nanay Ludy kay gusto niyang sutaon kun maayo ba ang akong pagkabutang sa akong boarding house. Nakauyon sab si Nanay Ludy sa atmosphere. Mibalik sab siya dayon ngadto sa among lungsod nianang pagkahapon. Igo lang gyud siyang nagsusi kun maayo ba ang akong kahimtang.
Pagkagabii, nag-ulhos pagpangabot ang ubang boarders. Didto ra ko sulod sa akong lawak, nakigbayloay og text kang Edward.
Mi-text siya nako nga moabot siya sa Tagbilaran nianang pagkaugma. Mibati ko’g kahinangop nga naghunahuna nga magkita na sab mi si Edward. Kun magkita ra ba mi, duna gyu’y mahitabo tali namong duha.
Nianang pagkaugma sa buntag, sayo kong mibangon ug naligo. May klase ko sa alas 7:30 sa buntag. Human makapamahaw, miadto na ko sa eskuwelahan kay pangitaonon pa ra ba ang room 303 diin adto ipahigayon ang una kong klase.
Paggawas nako sa kataposan kong klase sa buntag, nakadawat ko og text gikan kang Edward. Nagpahibalo siya nako nga nahiabot na siya sa Tagbilaran. Gusto siyang makigkita nako sa outlet sa McDonald. Kay wala na man koy klase ug sa 3:30 pa man ang sunod kong klase, gisanong ko si Edward. (Sumpayan pa)