Gula 228
Nianang pagkahapon, mitawag si sister Veronica sa buhatan ni Capt. Sancho Benale. Nagpakisayod siya kun unsay nahitabo sa lakaw sa mga polis nga gisugo niini sa pagpangita kang Rey.
“Napakyas ang akong mga tawo, sister Veronica,” maoy taho sa kapitan. “Wala gayud nila makita si SPO3 Corpuz.
Ingon sa nahugno si sister Veronica sa iyang nadungog. Napiyong niya ang iyang mga mata. Mora’g dihay hait nga kuko nga mikusnit sa iyang balatian. Daw mingiob ang iyang palibot.
“Hain man kaha diay siya mopaingon, Sir?” Nakasukot si sister Veronica. Mikarat ang iyang tingog. Kahilakon.
“Mao kanay pangutana nga lisod pa kaayong tubagon sa pagkakaron, sister Veronica,” nagkanayon ang kapitan. “Lakip kami nahingawa na pag-ayo sa iyang kahimtang.
“Paningkamoti ninyo, Sir, nga makit-an ninyo siya.”
“Ayaw lang kabalaka, sister Veronica. Dili kami molunga sa pagpangita kaniya.”
Human sa panagsulti nilang Capt. Sancho Benale ug sister Veronica, ang madre mihilak didto sa sulod sa iyang lawak.
Nianang pagkagabii, nagtaghoy-taghoy si Corporal David Benturada samtang nagsubay sa gamay’ng eskinita paingon sa gipuy-an niyang balay. Gilingaw niya ang iyang kaugalingon bisan ang tinuod nabalaka usab siya sa gihimo nga paglayas ni Rey gikan sa tambalanan. Napakyas sila sa pagpangita niini. -- Sumpayan pa