Dihay kahinam ug kakulba nga magpanungkil sa dughan ni Vanessa, samtang naghulat sa paggawas sa resulta sa paghiling kaniya sa doktor. Apan bisan kun dili siya anad, permi na ang iyang pag-ampo ug pagtawag sa Diyos ug nanghinaot nga makalingkawas siya sa daotan.
Ang pag-adto ni Vanessa ug sa iyang amahan sa Manila nagdulot og kagubot sa alimpatakan ni Albert. Naghigwaos ang iyang kahiladman. Lain ang iyang pamatyag sa kuba sa iyang dughan. Nagduda gyud si Albert sa lakaw sa amahan ug anak.
Wala masayod si Albert kun unsay iyang buhaton karon. Ang iyang kaisipan gikuligaw sa dili masabot nga mga pagbati. Unsa gyud kahay tinuod nga katuyoan sa duha didto sa Bicol. Mao kini ang lintunganay sa iyang kabalaka. Kabalaka nga gikumpayotan sa kahadlok nga wala niya matugkad kun unsay hinungdan.
Naputol ang paghanduraw ni Albert mahitungod kang Vanessa sa dihang may mihunong nga traysikol sa tungod sa ilang balay. Milili siya sa bentana. Iyang nakita si Nang Gloria nga nanaog gikan kini nangumpra. Midali si Albert pagkanaog ug misugat sa inahan sa dihang iyang nakita nga nagbaguod kini sa daghang mga pinalit. Ug gipahimutang ni Albert sa lamesa sa kusina ang mga pinalit sa iyang inahan.
“Nahiuli na man diay si Eking, Albert?†maoy taho ni Nang Gloria kaniya. -- Sumpayan pa