Presidente Marcos mitambong sa kadaugan sa Mactan

CEBU, Philippines — Gipangulohan ni Presidente Ferdinand "Bongbong" Marcos Jr., " ang pagtambong sa ika-503 nga pagsaulog sa Kadaugan sa Mactan kagahapon Abril 27. 

Kauban sa presidente si House Speaker Martin Romualdez nga gikuyogan usab sa mga kongresista sa Sugbo ug ubang mga opisyal sa lainlaing ahensya sa nasudnong kagamhanan ug sa Central Visayas.

Si Presidente Marcos sa iyang mensahe miingon, nga gikalipay kaayo niya ang paghandom sa kalihokan nga nagpakita sa pagkabayanehon sa atong katigulangan nga anaa pa gihapon hangtod karon dili lamang sa mga Sugboanon kon dili sa katawhang Pilipinhon.

Dugang pa niya nga dakong hagit sa paglingkawas dili lang batok sa mga pagpanaugdaug karong panahona ang angay nga atubangon sa katawhang Pilipinhon kon dili ang paglingkawas sa nasinating kalisod niining modernong panahon.

Lakip sa nitambong mao si Gobernador Guwendolyn Garcia sa Lalawigan sa Sugbo uban usab niini si Cebu City Michael Rama ug Mandaue City Mayor Jonas Cortes ug ubang opisyal.      

Si Lapu-Lapu City mayor Junard "Ahong" Chan sa iyang mensahe mipadayag sa iyang kahinangop sa pagtambong ni Presidente Marcos sa kalihukan.      

Nagpasalamat usab kini sa presidente ilabi na sa nahimo sa amahan niini nga si Marcos Sr. nga maoy nakapatukod sa 1st Bridge niadtong 1973 nga nakahatag og kasayon sa mga residente ug mga bisita.        

Lakip usab gipasalamatan sa mayor ang pagbukas sa Mactan Cebu Airport ngadto sa International Flights nga nakapakusog sa turismo sa nasud.     

Gitambongan usab ni PBBM ang gipahigayon nga Capsule Laying Ceremony sa Mactan Newtown Expo sa gitukod nga convention center nga adunay kapasidad nga 2,500 diin maoy gitinguha nga venue sa ASEAN Summit sunod tuig.

Gibana-bana sa Police Regional Office(PRO)-7 miabot sa 8,000 ngadto sa 10,000 ka mga tawo ang nisaksi sa anibersaryo sa Kadaugan sa Mactan.

Nunot niini, gihulagway sa PRO-7 nga malinawon ang pagbisita sa labing taas nga opisyal sa nasud dinhi sa Sugbo. “As far as peace and security is concerned there were no untoward incident recorded, nahimong epektibo ang atoang security coverage sa atoang President…So we would like to thank the people on the ground who work with the security of our President”, matod ni Police Lieutenant Colonel Gerard Ace Pelare, tigpamaba ni PRO-7 Regional Director Brigadier General Anthony Aberin.Romeo T. Limpangog/Rowena D. Capistrano/Decemay P. Padilla/MEL BANAT NEWS