CEBU, Philippines - Sa dili pa makigtigi silang Manny Pacquiao ug Jeff Horn karong Hulyo 2, adunay Pinoy’ng boksidor nga mouna pagpanulong didto sa Australia.
Siya mao si Mark Sales sa Davao, ang kanhi World Boxing Federation (WBF) International flyweight champion.
Si Sales gikatakda nga mohagit sa Australyanong Oriental and Pacific Boxing Federation (OPBF) welterweight champion nga si Jack ‘The Ripper’ Brubaker karong Abril 8 didto sa Doltone House sa Sylvania Waters, New South Wales.
Ang 35-anyos nga si Sales midaog og duha sa katapusan niyang tulo ka away pinaagi sa knockout. Una niyang gipakamang si Junard Postrano sa ikatulong hugna ug dayon si Joselito Campana sa ikaupat nga hugna niadtong Enero 21 didto sa Mindoro Occidental.
Bukid hinuon maoy tungason ni Sales batok sa 25-anyos nga si Brubaker nga dunay 12-1-1 record uban ang 6KOs. (BANAT NEWS)