PBA chairman buot mopaduwa sa mga naturalized players

CEBU, Philippines — Gusto ni PBA chairman Ricky Vargas nga ablihan sa liga ang ilang pultahan alang niadtong mga naturalized Filipinos nga nakasilbe sa nasud sa internasyonal nga mga kompetisyon.

Mao kini ang gipabuhagay nga reaksiyon ni Vargas human ang duha ka kanhi Gilas Pilipinas reinforcements nga sila si Andray Blatche ug Marcus Douthit mipadayag pinaagi sa ilang Twitter dili pa lamang dugay kabahin sa ilang tinguha nga makapakita'g aksiyon sa PBA.

“Our naturalized players who have served the country should at least be given a chance to play with us,” matud pa ni Vargas sa dihang nahinabi sa programang Power and Play ni Noli Eala sa TV5  niadtong Sabado. Si Blacthe maoy unang nagparamdam nga moduwa sa PBA ug misunod dayon si Douthit. Silang duha nanghinaut nga mahatagan og tsansa nga makaduwa sa labing unang propesyonal nga liga Asya isip mga local players. Nakaduwa na hinoon sa PBA si Douthit isip import sa Air21 niadtong 2012 Commissioner’s Cup ug ingon man sa Blackwater niadtong 2015 season. Samtang si Blatche maoy nangu sa Gilas Pilipinas nga mi-qualify sa 2019 FIBA World Cup didto sa China. Duha ka higayon nga gikonsidera siyang kuhaon nga import sa NLEX Road Warriors ni coach yeng Guiao apan pareho kining wala madayon.

Debatihan pa hinoon sa PBA ang yango-yango nilang Blatche ug Douthit apan ning sayo pa lamang si Vargas mihatag nang daan iyang suporta ning maong matang.

“Sa ngayon, the door is closed pa on that, that they become a local player in the pro league. We have not looked at it favorably at the moment,” dason pa ni Vargas, nga mao sab ang gobernador sa TNT Tropang Giga. “But this is, again, the changing landscape of basketball. If they can play in the national team, why can’t they play in the PBA?”