Janine Gutierrez, Sunshine Dizon, Lovi Poe

CEBU, Philippines — Dili malalis ang abilidad ni Bea sa pag-arte. Nagbakus siya og duha ka mga best actress awards: Movie Actress of the Year gikan sa Star Awards for Movies adtong 2016 pinaagi sa pelikula nga A Second Chance; ug Best Actress gikan sa Film Academy of The Philippines pinaagi sa pelikulang The Love Affair adto gihapong 2016.

Sikat kaayo si Bea. Daghan og product endorsements. Toprating ang tanang mga salida sa telebisyon. Box office hit ang mga pelikula. Apan kanang tanan dili lamang gumikan kay banggiitan gyud siya. Dakong porsyento niana mao nga lig-on kaayo ang makinarya sa ABS-CBN. Makamao gyud kaayo sila mopasikat ug muduma og talent.

Samtang sila si Janine, Sunshine, ug Lovi, dili kaayo mga sikat itandi kang Bea. Dili kaayo daghan og product endorsements kumpara kang Bea. Lalisunon ang box office results sa ilang mga pelikula. Apan sama kang Bea, dili sab gyud mabentahaan ang mga abilidad sa pag-arte.

Si Janine nagkwentas niining musunod nga acting awards: Best Actress gikan sa FAMAS Awards sa nilabay nga tuig alang sa pelikulang Babae at Baril; 2020 Best Actress sa Gawad Urian para sa sama gihapong pelikula; ug Best Actress sa 2019 QCinema International Film Festival pinaagi gihapon sa Babae at Baril.

Si Sunshine daghan kaayo og acting award nominations. Dili malalis iyang abilidad nga gipakita sa mga salida sa GMA7 sama sa Encantadia, Bakekang, Impostora ug Ika-6 Na Utos. Ang iyang mga pasidungog mao kining musunod: Star Awards for TV, Best Actress niadtong 2007 para sa iyang performance sa Bakekang, ug niadtong 2008 alang sa Impostora. Golden Screen Entertainment TV Award, Best Actress siya alang sa Encantadia adtong 2005; ug Best Child Actress sa Famas Awards niadtong 2006 alang sa pelikulang Kahit Butas Ng Karayom.

Si Lovi labihan sab kadaghan og nadawat nga mga pasidungog: Best New Female Personality sa Star Awards for TV niadtong 2007 pinaagi sa Bakekang; New Movie Actress of the Year sa Star Awards for Movies niadtong 2008 pinaagi sa pelikulang Shake, Rattle & Roll 9; Niadtong 2010 nakahakot siya og duha ka mga pasidungog nga mao ang Cinemalaya Independent Film Festival's Best Actress alang sa iyang performance sa Mayohan ug FAMAS Awards Best Actress para sa Sagrada Familia. Pagkasunod tuig, nidaog siya isip Best Performance by an Actress in a Leading Role sa Golden Screen Awards para gihapon sa Mayohan.

Aduna pa siyay duha ka best supporting actress awards. Ug sa nilabay nga tuig, sa gawas sa nasud na gyud gipakpakan ang iyang abilidad sa pag-arte. Kini atol sa International Film Festival Manhattan, diin siya maoy nakadawat sa Film Festival Director Award o Best Actress (Feature Film), pinaagi sa pelikulang Latay.

Sila si Janine, Sunshine, ug Lovi, puros mga banggiitan. Silang tulo makapahimulos na sa makinarya sa ABS-CBN aron mosamot ang ilang kasikat dili lamang dinhi sa Pilipinas kundili hasta na sa gawas sa nasud.

Si Bea atua na sa balay nga gibiyaan sa nahisgutang tulo. Kun dili na kaayo siya mosikat didto sama sa tulo ka mga nilayas, dili siya maalkanse kay silyado na ang iyang kontrata nga nagtangag og milyones.

COVID-19 ang nakaingon

Apektado ang lock in taping sa FPJ's: Ang Probinsyano didto sa Ilocos Sur hinungdan nga puros flashback o balik balik ang mga eksena nga gipasalida karon sa Kapamilya Channel ug TV5. Kini kay hilabihan ka taas sa Covid cases didto busa dili sila makabuylo og taping. Usa ka buwan na nga nag-istar didto ang grupo nga gipangulohan ni Coco Martin.

Sila lang usa

Malipayong gipaambit nila ni Vin Abrenica ug Sophie Albert nga nabunyagan na gyud ang ilang anak nga si Avianna niining bag-o lang. Nangayo sila og dispensa sa ilang mga higala lakip na mga ninang nga sila sila lang gyud ang nitambong gumikan usab sa health protocols nga gipatuman nunot sa pandemya. Pamilya lamang gyud ang nitambong, lakip na niini ang maguwang ni Vin nga si Aljur kauban ang anak niini nga si Alas.

Naluwas sa boksing

Wala modetalye si Yassi Pressman unsa ang mangiob nga panghitabo sa iyang kinabuhi kaniadto, apan iyang gipadayag nga boksing ang nakaluwas niya. Gumikan sa boksing nigaan matud pa iyang gibati kaniadto ug nausab ang iyang panlantaw sa kinabuhi. May mga pagsuway gihapon siya nga naagian hangtud nga nahibalag na sab niya ang mixed martial arts. Panawagan niya sa mga nagmasulob-on karon, o mga nawad-an na og paglaom nga dili lang gyud mosurrender, ug padayon lang sa pagpakalig-on. Panghinaot niya nga malingkawasan nila ang ilang suliran sama sa nahitabo niya.

Postpone sab

Inay sa Sabado, September 25, ang coronation night sa Miss Universe Philippines, ipahibawo na lamang unya puhon ang bag-ong schedule. Kini may labot gihapon sa mas gipahugtan nga safety protocols didto sa NCR nunot gihapon sa Covid 19. Busa aduna nay bag-ong schedule sab sa pre- pageant activities nga mao kining musunod: "September 23 - National Costume (YouTube); September 24 - Preliminary Interviews (KTX.ph); September 26 - Preliminary Swimsuit and Evening Gown (KTX.ph); September 29 - Last day of Lazada voting. Samtang 29 ka kandidata na lamang ang magtigi human usab niatras ang pambato sa Davao City nga si Ybonne Ortega gumikan kay positibo kini sa Covid 19.

Wapay klaro

Wala pay update si Andrea Torres kun matinuod ba gyud ang nabalita nga siya maoy ipares kang John Lloyd Cruz sa higayon nga mahinayon na ang sitcom sa aktor sa GMA7. Ikalipay niya kun matinuod sanglit sauna pa siya nangandoy makatrabaho si Loydie. Nahugyaw sab siya sa posibilidad nga makatrabaho na sila si Xian Lim ug Bea Alonzo puhon sanglit mga kapuso naman ang duruha. “Nakaka-excite rin kasi dahil never mo pa silang nakasama. Kaya parang feeling ko, interesting din na malaman kung paano kayo, paano kayo magwu-work together at saka, baka may makuha rin akong tips from them.” Gawas sa mga nahisgutan, ganahan sab siya makatrabaho sila si Tom Rodriguez ug Gabby Concepcion. Kasamtangan nga makita si Andrea isip usa sa mga asawa ni Dennis Trillo sa primetime series nga The Legal Wives.