Truck N' Trail, RW Freight gisubha'g daog sa Lycans Basketball League
CEBU, Philippines — Giablihan sa Truck N' Trail ug RW Freight ang tagsa-tagsa nila ka mga kampanya pinaagi sa usa ka masipang buto sa labing unang season sa Lycans Basketball League (LBL) nga misikad niadtong Huybes sa gabii didto sa Villas Magallanes Gym sa Barangay Basak, dakbayan sa Lapu-Lapu.
Si Jeric Gonzaga miposa og unom ka 3-pointers sa iyang 34 puntos uban ang upat ka rebounds ug usa ka steal aron ituboy ang Truck N' Trail ngadto sa 154-123 nga paglampaso sa Aquilla sa eksplosibo nilang engkuwentro
Naka-angkon si Gonzaga og igong suporta gikan nilang Barok Ceniza ug John Velasco nga mibomba og 25 puntos matag usa alang sa TNT.
Si James Villafuerte mitali og 31 puntos, si Jong Garcia mi-iskor og 28 samtang si Jhamer Ranceli mikadlit og 20 puntos apan nakawang ang ilang paningkamot alang sa Aquilla.
Sa laing akasiyon, si Joseph Cabahug mipupo og 16 puntos, walo ka rebounds ug tulo ka assists sa dihang gibuntog sa RW Freight ang Joher, 86-81.
Ang bag-ong naporma nga liga giorganisa ni businessman-sportsman Dondon Aropo sa Truck N' Trail Transport Services.
Magsubay kini og double round robin format sa eliminasyon. Ang top 2 teams dunay twice-to-beat advantage batok sa No.3 ug No.4 sa crossover semifinals. Ang mga mananaog maoy magbangga sa kampiyonato nga usa ka best-of-three series.
- Latest