Sports events molamas sa KaSa KaZa Festival sa ZaNorte

CEBU, Philippines — Usa ka serye sa paugnat sa kusog ang molamas sa Hudyaka sa Kadaugan sa Katawhan sa ZaNorte kon KaSa KaZa 2022 Festival. Ang Kadaugan Run Challenge maoy misikad sa usa ka semanang kalihukan niadtong Lunes sa buntag sa Zamboanga del Norte Sports Complex sa dakbayan sa Dipolog.

Gisundan dayon kini sa beach volleyball competition nga modagan og tulo ka adlaw sa Sunset Boulevard sa Dapitan. Karong adlawa, magsugod ang tulo ka adlaw nga tennis tournament didto sa Mibang Country Club tennis courts sa siyudad sa Dipolog.

Sa Huwebes atol sa pormal nga inagurasyon ni Dapitan mayor-elect Seth Frederick Jaloslos, ang Super Kickboxing ipahigayon sa ZN Sports Complex diin ang labing tang-an nga mga fighters sa probinsiya mowadwad sa ilang abilidad

Ang kulbahinam nga  Night Motocross maoy molingaw sa mga katawhan sa ZaNorte karong Biyernes.

Motak-op sa napuno sa aksiyon nga mga aktibidades mao ang Mountainbike XC Challenge gikan sa Dapitan ngadto sa Dipolog sugod sa alas 6 sa buntag karong Sabado, Hulyo 2. Sa susamang adlaw, ang live show sa sikat kaayong Eat Bulaga sa GMA-7 mohatag og dugang kasadya sa engrandeng inagurasyon ni Zamboanga del Norte governor-elect Rosalina Jaloslos sa alas-3 sa hapon sa ZN Sports Complex.