Kaso sa COVID-19 sa Cebu City nikunhod og mayo Rowena D. Capistrano
CEBU, Philippines — Malipayong gipahibalo sa head sa Cebu City Emergency Operations Center (EOC) nga si Konsehal Joel Garganera nga nimenos na gyud ang active cases sa COVID19 dinhi sa siyudad.
Sa datos nga iyang gipresentar kagahapon, aduna ray 377 ka active ang cases ang siyudad. Gawas niini ,niminos pud ang critical care occupancy rate sa mga tambalanan sa kaso sa COVID19.
Naa nalang kini sa 24.48% nga occupancy rate kun diin sa 141 ka mga pasyente , 60 ra niini ang taga Cebu City.
Padayon nga giawhag ni Acting Mayor Michael Rama ang katawhan nga bisan pa man naka-general community quarantine ang siyudad ,labing maayo nga sundon gihapon ang gihingosgan nila nga Oplan Puyo , ug mogawas lang sa balay kun dunay importante nga pagabuhaton. Matud pa niya nga dili gihapon angayan mokompyansa sanglit nagpadayon pa man ang hulga sa COVID19.
“Oplan Puyo remains enforced. Stay at home. Continue to practice Parental-Supervised Household Lockdown. Go out only when necessary,” suma pa ni Rama.
Sa kalambigit nga balita, 25 ka barangay sa dakbayan ang wala nay kaso sa Covid-19 sulod sa napulo ka adlaw sumala pa sa EOC.
Nag-una gihapon ang Barangay Guadalupe sa Top 5 nga adunay mga kaso gihapon sa Covid-19 diin adunay 27, gisundan sa Talamban-15; Camputhaw-14; Tisa-14 ug Lahug-12. –IBM (BANATNEWS)
- Latest