Naki Warriors nakasagunson og daog sa PCAP

CEBU, Philippines — Ang Lapu-Lapu City Naki Warriors mikadlit og talagsaong duha ka sagunson nga daog sa Professional Chess Association of the Philippines (PCAP) Open Conference niadtong Miyerkules sa gabii.

Gibidahan nilang National Masters Elwin Retanal ug Edsel Montoya ug Woman International Master Bernadette Galas, gipakaging sa Naki Warriors ang Surigao Fianchetto Checkmates, 14-7.

Gipaluyohan nilang Anthony Makinano, Bryle Arellano ug Alan Pason, ang Naki Warriors mipaksit sa Checkmates sa blitz , 6-1, ug dayon hingpit nga mipayaka sa ilang mga karibal sa rapid event, 8-6.

Human niini, ang Naki Warriors mibuntog sa Toledo City Trojans, 12.5-8.5.

Nagtabla sa blitz, 3.5-3.5, ang Naki Warriors mipiog sa Trojans sa rapid play, 9-5, aron pagposte sa ikatulo nilang daog sud sa lima ka duwa.

Duna sab hinooy angayan nga ikalipay ang Trojans human ilang gibuntog Iriga Oragons, 12.5-8.5, aron pagpuwersa og three-way tie uban sa Naki Warriors ug Fianchetto Checkmates bitbit ang parehong 3-2 nga baraha.

Sa laing bahin, ang Cordova Dutchess Dagami Warriors milampaso sa Cebu City Machers, 15-6.

Dobleng kalbaryo ang nadangatan sa Machers gumikan kay gilampornas man sab sila sa gamhanang Iloilo Kisela Knights, 2.5-18.5.

Gumikan niini, gipahugtan sa Iloilo ang ilang pagkupot sa solong liderato sa Southern Division uban ang perpektong 5-0 record samtang ang Cebu City padayong nangitlog human sa upat ka duwa.