Binhi sa kabag-ohan

Wala pay usa ka semana sa iyang paglingkod isip bag-ong presidente, daghan pa gihapon ang wala maka move on sa kadaugan ni Ferdinand “Bongbong” Marcos Jr. sa general elections niadtong Mayo.

Matag adlaw, padayon gihapon ang ubang sektor sa ilang protesta batok sa bag-ong administrasyon. Bisan didto sa ubang kanasuran sama sa Estados Unidos, adunay mga lihok protesta batok sa pamunoan ni BBM.

Hinuon matag gobiyerno sa bisan asang nasud aduna gyuy oposisyon. Bisan og unsa pa ka maayo ang iyang pagdumala sa nasud, anaa gyuy hut-ong sa katilingban ang dili kontento sa iyang pangagamhanan.

Hinuon, kabahin usab kana sa atong pagsagop sa demokratikanhong pamaagi sa pangagamhanan. Ug nagpasabot kana nga  himsog ang atong pagnabigar isip usa ka nasud. Mao nang angay lamang nga pasagdan kining mga protesta batok sa kagamhanan.

* * *

Dako nga bagahe ang gipas-an karon sa bag-ong presidente. Gawas sa nagkadakong utang sa nasud, ania pay problema sa food security nga angay hatagan og prayoridad. Mao kini ang hinungdan ngano nga si BBM mismo ang mihawid sa Department of Agriculture.

Di na ta maglaum pa nga mobalik ngadto sa P20 ang kilo sa bugas. Hangak na kaayo kana nga makab-ot. Ang angay tutokan sa kagamhanan mao ang pagpangita og pamaagi unsaon pagdoble o triple sa abot sa mga mag-uuma.

Niadtong unang panahon, ang Pilipinas maoy nag-unang producer sa bugas ug ubang agricultural products sa Asia.

Apan karon, nagsige na lamang kita og pag-import sa bisan unsang matang sa produktong pang-agrikultura.

Hinuon ang problema sa agrikultura sa nasud dili gyud masulbad sulod sa unom ka tuig ilalum sa pamunoan ni BBM. Apan mas angay sugdan karon ang pagtanom sa binhi nga mobag-o ug mopalambo sa sektor sa agrikultura.