EDITORYAL-Modernisasyon sa transportasyon

Strike while the iron is hot. Matud pa sa mga panultihon sa katiguwangan bahin sa dili paglangay kun dunay oportunidad. Mao kini ang angay buhaton sa bag-ong administrasyon sa panguna ni Presidente Ferdinand Marcos Jr.

Mintras init ug sipa kaayo ang suporta kaniya sa mga tawo nga sama sa kainit sa suporta sa mga Pilipino sa gipulihan niyang pangulo nga si kanhi presidente Rodrigo Duterte, kinahanglang molihok na dayon siya para sa  kun unsay makaayo sa Pilipinas.

Apan sa paghimo niini, kinahanglang kalkulado ug sigurado tungod kay lahi sa suporta kang Duterte, ang mga tawo mas makuti sa pagpaniid kang Marcos tungod sa kasaysayan sa pamilya niini.

Dili kinahanglang magpa-impress kun kini makapakamang og balik sa mga Pilipino. Ang angay unahon pagatiman aron mapalambo sa nasud karon mao ang suplay sa enerhiya ug transportasyon.

Nasugdan na sa termino ni Duterte ang modernisasyon sa public transport apan dili pa kompleto ug daghan pa gihapon kaayo ang kuwang. Kinahanglan kining makorihian ug palambuon pa.

Karon nga mahal kaayo ang presyo sa produktong petrolyo ug padayon ang pagsaka niini gikinahanglan kaayo ang alternatibong source sa enerhiya ug transportasyon nga di kinahanglang mogamit og petrolyo.

Nagkinahanglan ang Pilipinas og ambisyosong proyekto para sa tranportasyon nga di kinahanglang gamitan og petrolyo.

Kini ang electric rail systems sama sa gihimo sa mga modernong nasud sama sa Japan, China, ug sa Uropa. Tungod kay kinahanglan kini kuryente, kinahanglang unahon og tukod ang daghang planta nga nigamit og renewable energy.

Pinaagi niini, paspas ug dili hasol ang transportasyon gikan sa mga tawo, mga produkto ug serbisyo. Kun kini mabuhat sa gobiyerno, motakod kini sa kahimtang sa pamuyo sa mga tawo.

Kaning mga railway system sama sa nagpadayong proyekto karon didto sa Mindanao, kinahanglang mokonektar sa tanang rehiyon o probinsya sa nasud. Kay aning paagiha, tanang maagian niini siguradong paspas ang kalamboan.

Walay dautan kun mangandoy. Basta dili lang imposibleng kab-uton.