Kitay naalaot sa ilang pataka
Nagpanamilitay nang mga sakop sa Inter-Agency Task Force (IATF) sa kataposan nilang tigom sa niaging adlaw. Kay mobanos na sugod sa udtong tutok ugma ang bag-ong administrasyon. Nga hangtod sa akong pagsuwat ini wa pay klaro mopadayon o mopapas ba sa IATF. Gani, wa pay pahibawo nakatudlo na ba sa sunod nga health secretary.
Pero masulub-on kong mopahibawo nimo nga hangtod sa kataposang mga adlaw sa administrasyon ni Presidente Rodrigo Duterte, sama sa kinatibuk-an nga kapin sa duha ka tuig nilang pagduma sa pandemiya sa Covid-19, nagpabilin nga nagkaguliyang ang ilang mga numero.
* * *
Ang kataposang sinemana (Hunyo 20-26) nga update sa pandemiya sa gumagawas nang administrasyon, pinaagi sa Department of Health (DOH) nga maoy pangu nga ahensiya sa IATF, nipahibawo nga 51 ang namatay tungod sa Covid-19.
Pero giangkon sa DOH nga bahaw ang mga numero: Dunay nangamatay sa Enero ug Pebrero pa karong tuiga; ug, palihug panggunit sa imong lingkoranan, naapil sab sa ihap ang mga nangamatay sa Pebrero (sa ato pa, nagpaabot ang DOH sa liwas sa hubkas sa mga biktima) hangtod sa Nobyembre sa niaging tuig.
* * *
Naproblema na ang DOH sa wa magkadimao nilang mga numero sa una nga mga adlaw sa pagsulbong sa pandemiya. Kanunay’ng gipasangil ang kakulian sa ilang database nga CovidKaya. Ug kanunayng gipasalig nga gihapsay sa Department of Information and Communications Technology (DICT).
Nga wa pa matarung ang ilang ihap hangtod karon posible nga makapatin-aw nganong nagkayamukat ang ilang mga lagda. Wa katabang nga ang manamilit nang mga tagdumala mas ganahang mag-imbento sa ilang kaugalingong mga numero aron paghanig sa ilang pataka.
* * *
Ug ang ilang pataka maoy nihagbong sa nasud ug katawhan ning lawom nga gahong nga ato karong nahimutangan. Pataka nga lockdown (kinatas-an sa kalibotan) sa way pagpalambo sa mga ospital ug katakos sa healthcare workers pagtambal sa mga pasyente.
Pataka nga ayuda (nga kuwang pagtabang sa labing kabos pero gisagolan pa og pamolitika). Pataka nga pagpangabli sa ekonomiya nga nibalikbalik sa pagsulbong sa mga kaso. Pataka nga pagpangutang nga gipasangil sa mga bakuna pero gibubo sa mga proyektong way klaro. Ug pataka nga pamakuna nga naapsan sa paghupas sa mga bakuna ang gipasalig nga herd immunity.
* * *
- Latest
