“Secret weapon”

Upat ka adlaw nalang motapos na ang administrasyon ni Presidente Rodrigo Duterte ug mobanos ang bag-ong administrasyon.

Unya sa udtong tutok sa Hunyo 30 magsugod ang pamunoan ni Presidente Ferdinand “Bongbong” Marcos Jr.

Mokanaog sa pwesto si Duterte uban ang pakyas niyang saad nga hunongon ang problema sa drugas dinhi sa nasud ubos sa iyang pamunoan.

Apan luyo sa kapakyas dili malimod ang paningkamot sa iyang administrasyon nga mahunong ang apad nga problema sa drugas.

Dili ikalimod nga ubos lang sa iyang administrasyon nabatyagan sa publiko ang hugtanay nga kampanya aron mapuo ang dangan sa katilingban.

Dili perpekto ang kampanya, dunay mga bulilyaso sama sa ubang mga programa sa gobyerno, apan kabahin kini sa bisan unsang butang nga atong himoon.

Ang importante nga andam ka nga modawat sa sipyat ug mopatuman sa gikinahanglang kausaban aron pagkorehir niini.

Dako na og nasugdan ang kampanya batok sa illegal nga drugas ug hinaut dili mausik ang kahago sa administrasyong Duterte ubos sa bag-ong pamunoan.

Hinaut dili usikan ni Presidente Bongbong Marcos ang maong paningkamot pinaagi sa pagbutang sa hustong mga tawo nga modumala ug mopadayon sa kampanya.

Usa sa mga tawo nga magamit kaayo ni BBM alang niini mao si outgoing Senate President Tito Sotto.

Ang iyang dedikasyon ug lapad nga kasinatian isip kanhi chairman sa Dangerous Drugs Board makatabang pagpadayon sa kampanya.

Kabahin sab sa dugay na niyang adbokasiya ang pagpakigbatok sa illegal nga drugas.

Usa sa bintaha ni Sotto mao ang built-in niya nga communications group nga makatabang kaayo pagpasabot sa publiko sa mensahe sa kagamhanan.

Nagtuo ko nga dili igo ang pulos dakop sa pagsulbad sa problema. Importante kaayo ang edukasyon sa publiko aron sila makasabot sa kadaot sa drugas ug mohunong na sa paggamit niini.

Dinhing bahina magamit ang abilidad sa communications group ni Sotto nga gipangulohan ni Jen Corpuz-Legaspi.

Luyo sa kasayuran sa publiko si Legaspi maoy nagsilbing “secret weapon” ni Sotto sa iyang karera sa politika taliwa sa daghang kontrobersiya nga iyang naagian.