Panamilit sa tarong pang gobiyerno
Sa pagbanos sa bag-ong administrasyon nga pangulohan nilang presumptive president Ferdinand Marcos Jr. ug presumptive Vice President Sara Duterte Carpio sa udtong tutok sa Hunyo 30 ning tuiga, manamilit na lang tang daan sa dugay nang gipangandoy nga kausaban sa mas maayong pang-gobyerno:
Mas hiningusgan ug mas makiangayon nga pagkolekta sa buhis (kay ang pamilyang Marcos nagpaugat sa pagdumili pagbayad sa ilang P203.8 bilyones nga utang sa estate tax sa niaging 33 ka tuig, ug di mahitabo nga maningil sa ilang kaugalingon sa ilang pagbanos sa Malakanyang);
* * *
Mas paspas ug mas ligdong nga paghusay sa mga kaso nga dugay nang natanggong sa mga korte (kay ang pamilyang Marcos nagsige og dribol sa mga kaso batok sa ilegal nilang katigayonan, ug di mahitabo nga mag-apura karon nga sila nay manudlo sa mga huwes ug mga mahistrado);
Di kapaninglan ang mga responsable sa laktod nga pinatyanay sa kampanya batok sa ilegal nga drugas (di mahitabo nga ipadakop nilang Marcos ug Duterte sa International Criminal Court si Presidente Rodrigo Duterte ug iyang mga sinugo);
Di masilotan ang mga gilambigit sa P10 bilyones nga pork barrel scandal, P14 bilyones nga Pharmally scandal ug ubang anomaliya kay ang mga gipasanginlan maoy napili sa labing dagkong katungdanan sa gobyerno;
* * *
Di na mapasar ang balaudnon nga mopatuman sa pagdili sa 1987 Constitution sa politikanhong mga dinastiya kay kinabag-an sa Senado, House of Representatives ug lokal nga mga opisyal mga sakop sa 250 ka politikanhong pamilya nga way interes sa pagbungkag sa ilang politikanhong monopoliya;
Di na matarung ang mga lagda sa pagpili sa party list representatives nga, para ra unta sa labing kabos nga mga sektor sa katilingban, gidominahan na sa mga bilyonaryo ug higante nga politikanhong mga partido;
* * *
Di na mapatuman ang progresibong mga probisyon sa 1987 Constitution, hinunoa mameligro nga mawatas-watas sa charter change nga mahimong lakturon sa makabungog nga mayoriya sa Kongreso sa way pagkonsulta sa katawhan; ug
Di na matapakan ang higanteng buston sa sistema sa edukasyon nga napakyas sa pagtudlo sa mga bata sa batakang katakos sa pagbasa ug pagsabot, ni sa tinuoray nga mga panghitabo sa pagpanghasi, pagpangurakot ug lapad nga kagutom sa diktadurang Marcos.
* * *
- Latest
