Salamat Sogod

Bisan pa man kun nakapasalamat nako personally sa mga Sogoranon sa dihang nihimo sila og hinanaling pagresponde sa akong pakiluoy, angayan lamang nga sublion nako dinhi ang pagpasalamat.

Ngadto nila Mayor Richard ug Vice Mayor Monyeen Durano Streegan nga human sa ilang pagbasa sa sulat nga akong gipadala nipadala pud dayon sa ilang ayuda ngari sa akong parokya.

Ang maong hinabang wala lang sa munusipyo bisan gani ang Parokya ni Santiago Apostol nitabang gyud tawon nako.

Salamat Fr. Sarchez, ug Fr. Jayson. Dili pud kalimtan si Sir Duque ang kinatibuk-ang pwersa sa SGA Sogod nga ni-initiate gilayon sa fundraising drive. Ang PYCC ug uban pang mga religious organizations ingon man ang mga pribadong pamilya nga sukad kaniadto nitabang gyud kanako panahon sa akong kalisdanan.

Salamat kaayo ninyong tanan! Dili ko kini hikalimtan ug pagaisipon ko kining usa ka dakong utang kabubut-on. Nalipay kaayo ang akong mga parokyano ilabina na ang mga nagkalisud lilsud.

Daghan gyud mi og nahatagan gumikan sa inyong kamanggihatagon.

Nigitib ang bidlisiw sa paglaum sulod sa akong kasingkasing sa gipakitang kamanggihatagon sa kanhi ko ka mga parokyano.

Bisan gani si Mam Aylin Parado wala man gyud maglangay. Gitabangan baya gyud mi niya ning panahon sa dakong kalisud.

Salamat kaayo Mam Aylin ug sa imong pamilya apil kamo kanunay sa akong mga pag-ampo.

Hinuon dili lang kini mahitungod lang sa paghatag apan ang gipakitang kaikag sa pagpatalinghug sa atong mga mulo nakapadasig pud kanako sa pagkahimong abli sa panginahanglan usab sa uban.

Tinuod gyud nga gipanalanginan ang mga cheerful givers. Salamat sa Dios tungod kanila!

Pasalamat ko sa Ginoo nga gidungog niya ang akong mga pag-ampo dili lang alang kanako kondili usab alang sa akogn mga parokyano nga mas nagkinahanglan pa kay kanako!