Natandog ko

Daw natandog ako pag-ayo sa dihang dunay panimalay nga among giduaw ang nangandam gyud sa panihapon. Hinuon dili man kini mahitungod sa panihapon lamang kay sayod ko nga nakakaon man mi sa wala pa kamo moadto.

Ang balay nga among giduaw daghan baya pud og guba. Ako siyang giingnan nga wala na lang gyud unta siya mag-andam. Mapahiyumon siyang nagkanayon nga mapasalamaton siya sa gihapon kay bisan pa man sa bagyo, nahimong naduaw gihapon siya sa imahen sa Batang Balaan ang senyor. Natandog ako tungod kay sa panahon karon nga lisud kaayo anaa gihapoy mga tawo nga padayong nagmanggihatagon taliwala sa dakong kakulangan.

Nadasig ug naikag ako sa maong gipakita niya. Mao nga ang akong kasingkasing nilumpayat sa linaing pinitik. Anhi nako nakita ang bili sa kinabuhi. Mag-unsa man tuod ang bahandi, katakos, kalantip kun padayong kawang ang tanan alang kanimo. Mag-unsa man tuod ang imong paningkamot kun ang Dios kanimo wala mahimuot.

Sa laing bahin, gibati ko og kahiamgo nga pwede ra diay nga gamiton ang kasingkasing sa baboy aron maoy ihulip sa kasingkasing sa tawo. Nahitabo kini didto sa gawas sa nasud. Si Mr. Benett sanglit dunay problema sa iyang kasingkasing ug nahimong malampuson ang maong first of a kind nga operasyon. Hayan dili na kinahanglanon pa ang transplant nga gikan sa mga tawo mismo.

Apan ang pangutana mao: Unsa kaha ang tingog sa pitik ini sa? Oink ba kaha? Apan timailhan lamang kini nga dunay complementarity sa gihapon ang kinaiyahan ug kita ingon nga kabahin sa kinaiyahan kinahanglang mosubay kun unsay gilatid niini. Bisan gani ang maong baboy bisan supak sa iyang kabubut-on, nakatampo man og dako alang sa kaayohan sa maong tawo.