EDITORYAL - Rota sud sa Carbon

Planong pagpabalik pagsulod sa mga jeepneys diha sa Carbon Public Market kinahanglang tun-an una og maayo kung kinahanglanon pa ba gyud karong mga panahona.

Maayo ug dili na kaayo grabe ka traffic ang maong merkado human gibawalan ang mga pasaheroan nga makasulod tungod sa pandemiya sa Covid-19/

Apan bisan pa gani wala nay mga pasaheroan maghuot paman gihapon usahay ilabi na ini og kagabii ug sa kaadlawon.

Kini tungod kay gawas nga modagsa anang mga orasa ang mga mangomprahay, modagsa man sab ang daghang mga e-bikes, karomata, mga motor, mga pribadong sakyananan ug delivery vehicles.

Kung pasudlan kini og balik og mga pasaheroan, mosamot gyud kahuot ang trapiko anang mga orasa.

Kung ipamugos gyud, mas maayong dunay oras nga ihatag kun kanus-a ra makasulod ang mga pasaheroan.

Labing maayo kun sa oras nga dili peak hours sila pasudlon aron di magdasok ang mga tawo ug mga sakyanan. Pinaagi sab niini, mamentinar ang gidaghanon sa mga tawo nga mag-abot sa usa ka lugar.

Kay kun pasudlan kini og balik, anha na magdiskarga ug magkarga og mga pasahero ug produkto ang mga pasaheroan nga maoy hinungdan sa grabeng traffic.

Maayong tan-awon ug badlungon sab tingali kining mga karomata nga diha sa tunga sa dalan magpundo samtang nagpaabot og karga. Dili kinahanglang wad-an sila og panginabuhian, kinahanglan lang silang pasundon sa mga lagda.

Molampos lang ang mga lagda kun hugtan ang implimentasyon ug duna gyuy mag-roving nga mga enforcers ani 24/7, ug kinahanglang duna gyuy multa nga ipahamtang sa mga malapason.

Magunsa ra man ng mga lagda kun dili ipatuman? Dili madisiplina ang tawo kun dili seryuso ang mga otoridad pagpatuman sa mga balaod o lagda.

Total naanad naman ang mga tawong mangompra nga walay pasaheroang masakyan diha sa sulod, mas maayong ipadayon nalang nga way pasaheroang pasudlon.