Gobernador nalimpiyo?

Gilimpiyohan sa Korte Suprema si Gobernador Gwendolyn Garcia sa kasong administratiba nga gisang-at kaniya nunot sa pagpalit sa kagamhanang lokal sa lalawigan sa Sugbo sa yuta nga gipanag-iya sa mga Balili sa kantidad nga hapit moabot og P100 milyones niadtong tuig 2008.

Niadtong tuig 2011 nakita sa Ombudsman nga sad-an sa kasong administratiba bisan pa man sa iyang subling pagkapili pagka gobarnador niadtong tuig 2010. Ang gobernador gipanalipdan pa sa Condonation Doctrine sa dihang gipasaka ang kaso batok kaniya niadtong tuig 2011.

Ubos sa Condonation Doctrine, ang administratibang tulobagon sa usa ka pinili nga opisyal mawala dayon kun siya subli nga mapili sa samang posisyon nga diin napasakaan siya og kaso.

Bisan pa og giabandonar na sa Korte Suprema ang Condonation Doctrine nga gitawag og Aguinaldo Doctrine niadtong tuig 2016 apan epektibo gihapon dihang napasakaan og kaso si Gobernador Gwendolyn Garcia.

Ang gobernador miapilar sa hukom sa Ombudsman ngadto sa Court of Appeals nga mipakanaug og hukom pabor kaniya hinungdan sa pagdangop sa Ombudsman ngadto sa Korte Suprema nga mipabor usab sa hukom sa Court of Appeals.

Ang Korte Suprema mipasabot nga sayop ang Ombudsman sa pag ingon nga ang Condonation Doctrine igo lamang nagwagtang sa silot ug wala kini magwagtang sa salaud. Ang Korte Suprema miingon nga Condonation Doctrine nagwagtang sa salaud ug sa silot niini.

Tinuod nga sa pagkapili pag-usab ni Garcia nawagtang na ang salaud nga iyang nahimo ug ang silot nga gitangkil niini tungod kay ang subli nga pagkapili sa gobernador nagkahulogan og pasaylo. Kay gipili pagbalik ang gobernador bisan pa man nakahimo siya og salaud, buot ipasabot, gipasaylo siya sa mga tawo sa salaud nga iyang gihimo.

Busa, ang paglimpiyo sa Korte Suprema kang Garcia sa iyang kasong administratiba wala magpasabot nga wala siya makahimo og salaud. Nakahimo gyod siya og salaud apan gipasaylo lang sa mga tawo.

* * *

Happy Birthday sa among Barangay treasurer sa Barangay Quiot, Cebu City Rosielda "Langlang" Cavan Tabada. The Barangay Council Wish you all the best.