Dili lang unta iapil-apil ang patay sa pamolitika

Sama sa sunog nga dali kaayong nakakatap ang social media post ni Cebu City Congressman Bebot Abellanosa. matod pa niya nga... “BREAKING NEWS Dakong sunog karon sa Mambaling.

Daghang firetrucks wala ka responde kay gigamit sa mga routa sa funeral procession ni Mayor Edgar Labella, nahutdan ug tubig kay gigamit sa water salute pag-agi sa patay nga lawas.”

Pastilan ako nga nakabasa nagtuo sa sinugdanan nga fake information o hinimohimo lang ang naasoyng post ug gigamit lang ang pangalan ni Bebot kay sa tuno sa estorya dili gyud pang-congressman. Laliman mo na nga giapil-apil man itawon ang patay sa post nga ingon niini nga dili pa gyud tinuod.

Ug sa dihang akong giukay ang social media page sa magbabalaod, tinuod gyud diay nga iyang post kini. Apan naa nay gipagawas nga katin-awan kuno nga nagkanayon “P.S. Klaripikasyon: With due respect, walay intention to question or to dishonor sa gihimo nga paghatag ug final honors alang kang Mayor Labella.

Ang atong gi question dinhi ang organizer - sa dakong sayop sa pag gamit sa mga firetrucks sa maong okasyon, labi na nga naatol sa pagbuto sa sunog sulod sa akong distrito.

The readiness to respond to emergency has been hampered. It is unlawful to use public emergency facilities like firetrucks for purposes other than saving lives and properties. Responsible city government officials should not have allowed this in the first place. It is not in accord with Republic Act 10121.”

Bisan ug gi-edit na sa magbabalod ang iyang post, gikuninitan gihapon kini sa social media nga misumbalik kaniya ang tanang pagsaway nga tataw kaayo gigamit sa pamolitika apan ang nakaparat kay ang patay giamong pa basta lang makakuha og attention sa mga tawo.

Usa ko sa nag-cover sa paglubong ni Mayor Edgardo Labella ug nasaksihan nako ang tanan nga kasikas maong nakaingon ko nga sayop ang kasayoran ni Abellanosa nga gi-post sa iyang social media nga wala karesponde ang mga fire trucks sa sunog kay gigamit sa funeral route ug nahurot ang tubig kay gigamit sa water salute.

Una pipila ra ka fire truck ang nag-atang sa funeral convoy diin gipasitan og tubig ang karo nga gisakyan sa lungon sa mayor.

Kong kwentahon ang tubig wala ra seguro makahurot og duha ka balde ug dali ra sad kaayo kay kusog kusog man ang dagan sa funeral motorcade.

Inig labay sa funeral convoy mibiya naman usab dayon ang mga fire trucks ug namalik sa ilang area kong asa sila nga baranggay o estasyon nag gikan.

Pasado ala una kini gihimo ug ang sunog sa Mambaling nahitabo pasado alas alas singko na sa hapon ug nakaresponde dayon dayon ang mga bombero pero nasangit sila sa kahagip-ot sa agianan sa fire scene.

Subo palandongon nga gikan sa usa ka respetadong tawo nga anaa sa pwesto ang mohimo og ingon niini nga kasayoran ug giamong among pa gyud ang tawo nga namatay na nga kauban pa nila sa serbisyo, managlahi man sila nga partido apan pareho silang nag alagad sa katawhan.

Respeto lang unta sa pamilya ug mga Sugboanon nga nagbangutan dili lang pud unta yamayamaan kay bisan unsaon pa sa pagpangatarungan ug pagbawi dili gyud ma-justify ang kasakit nga namugna, maayo lang unta kong tinuod apan wala pa gyud kiniy basehan.

Dili naman makabalos ang patay sa pag-post sa iyang social media apan hibaw-i nga ang simpatiya sa mga tawo anaa ra ba gyud sa namatay kansang pamilya anaa sa kasub-anan.

Basin baya sama sa sunog maangin ug mapaig ang politikanhong ambisyon sa tawo nga naghimo sa ingon.