Kuwang sa koordinasyon

Nakugang ang dakbayan sa Sugbo dihang nasayran nga adunay gipahigayon nga clinical trial sa bakuna nga ginama sa usa ka kompanya sa China ang WesVac Biopharma.

Gibutyag kini atol sa privilege speech ni Konsehal Dave Tumulak sa konseho human niya nadawat ang kasayoran gikan mismo sa mga subject sa clinical trial nga giingong nakadawag og kwarta gikan sa P2,500 ngadto sa P5,000.

Ang Cebu City Health Department wala usay kasayoran sa clinical trial nga gisugdan niadto pang buwan sa Oktobre maong nahingangha human masayri ang gihimong testing sa bakuna gamit ang mga molopyo sa dakbayan.

Samtang ang direktor sa Department of Health  Region 7 Dr. Jaime Bernadas miingon nga wala man moagi sa iyang buhatan ang programa, hinuon nasayod siya nga dunay communication letter ang nagpasiugda ngadto sa dakbayan sa Sugbo.

Posible usab nga naa ra kini sa buhatan sa mayor apan niadtong tungora nag-leave naman si Mayor Edgardo Labella hangtod karon maong wala matagad.

Si Vice Mayor Mike Rama nga maoy acting mayor wala man usay kasayoran mahitungod niini busa nakig-alayon na ang Cebu City LGU ngadto sa DOH 7 ug mismo naghimo sa clinical trial.

Giklaro sa lokal nga kagamhanan nga wala silay pagsupak sa clinical trial kay kabahin mam kini sa pagpalambo sa medisina gamit sa virus nga gikahadlokan apan gikinahanglan lang nga adunay tataw nga koordinasyon aron dili maapektohan ang programa sa syudad sa pagpamakuna.

Simbako adunay natusokan na sa bakuna nga gigamit sa clinical trial unya mosekreto nga magpabakuna sa syudad kay gustong makakuha og vax card kay gamitonon kaayo unya kong naay dautang mahitabo, kinsa man ang mabasol? Siguro mapasanginlan gyud ang LGU ug dili ang clinical trial.

Pangagpas lang kini apan dunay basehan ug posibleng mahitabo, ilabi na kay dili na maka-avail ang mga tawong napaubos sa clinical trial sa mga benepisyo nga makuha sa mga fully vaccinated sa LGU.

Gikinahanglan ang hugot nga koordinasyon karon kay lahi ang sitwasyon kaniadto nga walay vaccine program ang mga LGU.

Aron malikayan ang kalibog ug pagduda sa mga tawo, angayan nga ipahibawo ang ingon niini nga kalihokan aron mapangandaman ug matabangan sa mga LGU ugaling adunay problema nga motumaw.