EDITORYAL -Pilion kadtong angayan

Karon palang, kinahanglan ng hunahunaon og maayo sa mga tawo kun kinsa ang ilang piliong mga lider gikan sa pagka-presidente sa nasud hangtud sa mga konsehales sa dakbayan ug kalungsoran sa umaabot nga piniliay sa tuig 2022.

Naila kaayo ang mga Pilipino nga mahiligon sa mga uso, sa popularidad ug kadtong bag-o. Wala hatagi og importansiya sa kadaghanan kun kunsay background sa ilang mga botaran, basta kung kinsa ray naglanog-lanog mao na kana.

Walay bili kanila ang ilang sagradong boto tungod sa kakulang nila og interes kabahin sa kaugmaon sa nasud. Kay para nila, kung unsay sangputanan sa gihimo sa kadaghanan tabla ra ang tanan. Kun sa kalipay ug kalisdanan parehas ra.

Apan sayop kini nga panglantaw, ang matag indibidwal dunay kaugalingong dalan ug ambisyon sa kinabuhi, gamay man o dako. Apan mas maayong ang ambisyon makabenepisyo ang kadaghanan ilabi na ang mosunod nga mga henerasyon.

Dili angay maghunahuna sa kaugalingong kalamboan o kaparotan kay mas maayong batasanon nga magtan-aw ngadto sa unahan o sa umaabot nga panahon ug dili lang ang karon. Tungod kay kung positibo ang panglantaw sa unahan, awtomatikong matarong ang karon kay duna man kini tumong para sa kaugmaon.

Sa pagpili og kandidato, maayong tan-awon kun unsay nahimo aning mga tawhana diha kanila, direkta man o dili direkta. Kung duna kini nahimong maayo, hatagan og higayon nga makapamuno.

Apan kadtong nagsalig lang sa popularidad unya wala gani nabuhat o natabang sa katawhan sa bisan unsang paagi o kapasidad, opisyal man o dili maayo tingaling dili nalang pilion. Kay magunsa raman sila unya kung sila nay naa sa posisyon nga sa wala pa sila niini wala man gani sila nahimo kondili ang magpasikat lang sa ilang pangalan.

Usa sa maayong pangitaong hiyas gikan sa mga kandidato mao kadtong tinuoray nga may pagbati sa katawhang Pilipino, sa estorya ug sa buhat. Dili pulos lang estorya. Kadtong dunay dedikasyon sa tahas bisag walay suporta gikan sa uban. Anhang dapita makita ang tinud-anay nga dedikasyon, nakatabang bisan wala tabangi.

Mao kini ang klase sa mga lider nga maayong pangitaon sa mga botante aron botaran.