EDITORYAL - Bakuna sa kabataan

Samtang gitinguha sa gobiyerno nga mabakunahan batok coronavirus disease ang 70 porsiyento sa populasyon karong tuiga, maayo unta og ilang iapil niini ang mga kabataan basta dunay pagtuon nga ang bakuna luwas para kanila.

Dili mahimong ang mga 18-anyos pataas lang maong bakunahan aron protektahan gikan sa Covid-19. Bisan pa og moingon ang gobiyerno nga bawal ang mga bata makagawas-gawas sa balay karong mga panahona dili kini garantiyang dili sila matakdan.

Ang mga hamtong sa pamilya nga magsige og gawas-gawas sa balay aron manginabuhi, may bakuna man o wala, may posibilidad nga matakdan niining virus ug madala sa ilang mga panimalay ug peligrong matakdan nila ang ilang kabataan.

Nakita sab nga nagkadaghan na sa mga kabataan ang natakboyan karon sa virus ilabi na sa pagsulbong aning Delta variant.

Gawas pa niana, pwerte nang luoya sa mga kabataan karon nga sa ilang paminaw mura og kaaway sila sa gobiyerno tungod aning pagtanggong kanila magduha na ka tuig. Daghan na sa mga kabataan karon ang nakat-on paglighot ug mosupak sa mga ginikanan aron makagawas sa balay.

Pila ka porsiyento sa populasyon karon sa Pilipinas ang kabataan. Kaning mga edara maoy mosunod nga modumala sa nasud. Nagtubo silang kuwang sa angay nilang makat-onan gikan sa gawas sa ilang mga panimalay sama sa pakighugoy-hugoy sa ubang tawo.

Nakadugang pa gyud kining distance learning, samot na nga wala na silay kahigayonang makauban ang mga kaparehas nila og edad kon diin daghan silang mga maayong pagtulon-an sa kinabuhi nga makat-onan nga makapahimo kanilang andam sa pagabot sa panahon.

Maayo ang tumong sa gobiyerno, apan kun pulos lang mga hamtong ang bakunahan dili kini makatarunganon.

Kinahanglang protektahan sab ang mga bata ug dili kini mahimo kun ang proteksyon pinaagi sa pagtanggong kanila sa sud sa ilang mga balay. Mao ra ni kaya sa gobiyerno para sa kabataan?

Ang kahimsog sa panglawas dili lamang tanan bahin sa lawas kondili hasta sa panghunahuna ug paminsar.

Kun ang mga bata magpadayon sa ingon niini nga sitwasyon, makapaabot og lahi nga klase sa henerasyon ang Pilipinas sa mosunod nga napulo ka tuig gikan karon.