Nganong karon pa man?

Dunay edaran nga tingali sa iyang pagkabatan-on nahimong pakyas diha sa iyang gipangbuhat. Sa maong kapakyas nahimong napukaw ang kaikag nga tul-iron kunohay ang mga sayop nga nahimo pinaagi sa paghunahuna kunohay sa mga tawo nga nalambigit kanhi sa kadautan sa tawo nga gikalambigit sa maong tawo sa kasamtangan.

Ang nakapait pa gyud niini mao man ang pagkahilabtanon nga walay sama kinuyogan sa mga alipores nga utro pud nga mga walay ikatampo sa gitinguhang kalamposan ug kalamboan. Mga tawo nga bugtong pamantay lamang ang nahimo ug diha lang gyud kutob.

Kun buot hunahunaon kapoy ra kaayo atubangon kining maong matang sa mga tawo nga patagad ug patimbaya. Mga tawo nga kang kansang tanlag sama kaitom sa ilang bulok. Mga tawo nga buot mogawas nga mga bayani apan sa kanhiay nga kabatan-on sa paghimo og maayo ang magdumili. Ang kahawod gisukod sa iyang kinaugalingong sukaranan.

Kun kabus ang moduol bugtong insult lamang ang madawat. Apan kun dato gani ang moduol bugtong pahiyom ug pag-abi-abi lamang ang mahimo. Makaingon pud ta nga nahimong masakiton ang sistema bisan gani diha sa hawanang sagrado, imbis Ginoo ang hisgotan nahimong anaa sa ngilit lamang ang Ginoo. Mas gipatigbabaw pa hinuon ang panlantaw nga kinaugalingon. Lisud dawaton apan maoy tinuod.

Apan dili maayo nga magpaapekto ning mga tawhana. Kay kining mga tawhana maayo lang kun dunay makuha gikan nimo. Apan kun wala gani ang benepisyo sila pud ang magpahilayo. Mahinungdanon nga mobalik kita sa pinakadugokan sa atong pagpaningkamot, walay lain kondili ang Dios.

Nihimo kita og maayo aron dili daygon ug labaw sa tanan, nihimo kita og maayo kay pinaagi lamang niini atong gibansay ang tinud-anay nga kahulogan sa gitawag nilang kagawasan. Ang tukmang panahon sa paghimo niini, karon gyud ug dili ugma, kay ang ugma wala namay kasegurohan.