Voters registration gihimo sa mga malls sa siyudad
CEBU, Philippines — Subling nagpahinumdom ang Commission on Election (COMELEC) Cebu City sa katawhan nga ang voter’s registration didto gipahigayon sa mga malls sa siyudad.
Kini human nga daghan ang miadto sa ilahang buhatan aron magparehistro aron makabotar sa umaabot nga Barangay ug Sangguniang Kabataan Elections.
Kagahapong adlawa, Hulyo 4 gasugod na sa pagpanawat og rehistrante ang COMELEC ug matapos kini sa petsa 23 ning buwana.
Si Atty. Marchel Sarno, Election Officer sa COMELEC Cebu City North District miingon gikan sa July 4 hangtud sa petsa 6 sila sa North District mohimo og satellite registration sa Times Square Talamban; July 7 hangtud sa 9 adto sa Robinson’s Cybergate ug July 18 hangtud 23 sa Robinson’s Galleria.
Sa South District July 4 ngadto sa 6 adto sa SM Seaside City Cebu ug July 18 -23 sa Robinson’s Galleria uban sa North District.
Ang satellite registration magsugod sa Lunes hangtud Sabado gikan sa alas 8 sa buntag hangtud sa alas 5 sa hapon.
Giklaro ni Atty. Sarno dili modawat og registration ang ilang buhatan apan ang serbisyo nga ilang gitanyag sa kasamtangan mao ang pag-issue og voter’s certification.
“Klaruhon nako sa Times Squares is registration, transfer, correction of entry, reactivation, ang diri is certification, gituyo nato ni og bulag para ma-decongest lang ta”, sigon ni Atty. Sarno.
Aron marehistro ug makabotar sa umaabot nga Barangay ug SK Election kinahanglan lang magdala og valid ID.
Suma ni Sarno nga wala sila’y quota kun pila ang marehistro apan kini mitataw nga mas maayo nga daghan ang magpa-register. Giklaro sa COMELEC Cebu City nga ang magparehistro aron makabotar sa SK election kinahanglan mag 15 anyos on or before December 5. —MEL (BANATNEWS)
- Latest
