Rama midangop ni Go tungod sa pagnihit sa paracetamol
CEBU, Philippines — Midangop si Cebu City Mayor Michael Rama kang Senador Christopher Lawrence “Bong” Go nunot sa pagnihit karon sa supply sa paracetamol nga maoy sagad ipang-alibyo sa mga kasagarang mitumaw nga sakit sama ubo, hilanat ug sip-on nga buot niyang ipangapud-apod sa kabalayan.
Ang shortage sa maong tambal una nang nasinati didto sa kaulohan sa milabay nga semana apan karon naabot sa mayor ang report nga kasagaran sa mga botika nahutdan na og mga paracetamol.
Una na nga gitingoha sa mayor nga magpadala og mga tambal ngadto sa katawhan ug didto mismo sa kabalayan niini. Sa nangagi niya nga interview gipadayag niya nga usa sa iyang hatagan og tahas sa distribusyon niini mao ang mga barangay health worker aron maoy mosuroy sa mga sitio aron iapud-apod ang maong tambal isip kabahin sa programa niya sa panglawas.
Gipatun-an pa ron sa mayor alang sa mahimong proseso o guidelines sa maong programa. Tumong usab niini nga dili mogawas sa mga panimalay ang mga tawo kun duna sila’y paliton nga mga tambal nunot sa padayong hulga sa Covid-19.
Matud ni Rama nga kun mahimo mogawas lang kun gikinahanglan subay sa gipatuman sa siyudad karon nga Oplan Puyo.— IBM (BANATNEWS)
- Latest