Novena masses sa Pista Senyor sunod tuig ipaagi gihapon sa virtual

CEBU, Philippines — Gibutyag ni Konsehal Phillip Zafra, chairman sa committee on peace and order nga virtual gihapon ang pagpahigayon sa mga novena mass sa Pista Señor sa sunod tuig.

Mao kini ang pasiuna nga kasabotan sa mga kaparian sa Basilica Minore del Santo Niño ug sa mga representante sa kagamhanan sa Siyudad sa Sugbo.

Giklaro ni Zafra nga aduna pay opisyal nga presscon ang kaparian sa Basilica alang sa lapad nga panagpasabot kalabot sa maong kalihokan.

Gitataw hinoun niya nga inisyal pa lang kini nga hukom ug agdon ra usab ang mahimong dagan sa panahon alang sa posibleng kausaban niini.

Giingong gilikayan lang ang nahitabo sa nilabay’ng buwan sa Enero diin adunay napahigayon nga pisikal nga novena masses sulod sa upat ka adlaw apan giusab dayon kini ngadto sa virtual mass sa ikalima nga adlaw ngadto na sa adlaw sa pista.

Ang pasiunang desisyon alang sa Pista Senyor sunod tuig naumol gumikan sa nagpadayong hulga sa COVID-19.

Sa niaging adlaw, nibisita sa  kaparian  sila si Zafra , mga representante sa Cebu City Police Office ,  hepe sa  Prevention, Restoration, Order, Beautification and Enhancement (PROBE) team Raquel Arce ug Barangay  Santo Niño Captain Lourdes Lulu Ramirez alang sa security and public safety preparation  sa Pista Senyor. BDB (BANATNEWS)