Driver nga nakaligis patay sa nagmotor gipasakaan og kaso
CEBU, Philippines — Gipasakaan sa kapolisan og kaso nga reckless imprudence resulting to homicide ang drayber nga nakaligis patay sa usa ka motorista sa Marcelo Fernan Bridge niadtong miaging Sabado sa hapon Oktubre 16, 2021.
Si Police Lieutenant Colonel Franco Oriol, hepe sa Traffic Enforcement Unit (TEU) sa Mandaue City Police Office (MCPO) miingon ilang gipasaka ang kaso bisan og nakigsabot na ang pamilya sa biktima alang sa settlement.
"Ilaha na nang katungod sa pamilya sa pag come up og negotiation pero kami amo gyud ipasaka ang kaso kay nakita man nato nga naa gyu'y negligence ang ilahang driver maoy hinungdan sa pagkamatay sa usa ka motorista,” ni Oriol pa.
Sa nasayran nga naligsan patay ang biktima nga si Rudy Amistad, 52 anyos nga molupyo sa Sitio Abuno sa Barangay Pajac, Dakbayan sa Lapu-Lapu samtang nagsakay kini sa iyang motorsiklo.
Ang driver sa dump truck nga si Aldwin Hermosilla, 49 anyos nga molupyo sa Dakbayan sa Carcar ang mitahan sa kapolisan human sa maong hitabo ug gitanggong sa detention cell sa MCPO. —MEL (BANATNEWS)
- Latest