Abot sa probinsiya sa Sugbo nisaka og 10.53 porsyento

CEBU, Philippines — Nikabat ngadto sa P3.9 bilyones ang kita sa Probinsiya sa Sugbo sulod sa siyam ka bulan karong tuiga o nisaka og 10.53 porsyento itandi sa P3.5 bilyones sa susamang mga bulan sa tuig 2020.

Kini base sa comparative analysis report sa revenue sa probinsiya sa tuig 2020- 2021.

Apil sa kita ang Internal Revenue Allotment (IRA) nga kapin P3 bilyones diin 7.18 porsyento o P205 milyones ang pagsaka gikan sa P2.8 bilyones sa tuig 2020. Samtang sa local sources, nisaka usab ang kita sa probinsiya diin niabot ngadto sa P419 milyones ang kita gikan tax ug non-tax collection sukad niadtong buwan sa Enero hangtud sa Septiyembre diin 111.66% ang pagsaka niini gikan sa P198 milyones sa tuig 2020. Matud ni Atty. Roy Salubre, provincial treasurer nga ang kita real property tax maoy usa sa pinakadako nga natampo sa local sources sa probinsiya.

Sa total tax revenue, nikabat ngadto sa P313.8 milyones ang nakolekta sa Kapitolyo sukad buwan sa Enero hangtud Septiyembre karong tuiga.  Lakip niini ang real property tax nga P152 milyones diin P87.7 milyones o 135.43% ang pagsaka niini gikan sa P64 milyones sa niaging tuig.

Lakip usab sa dako nga natampo mao ang koleksiyon sa sand ang gravel nga nikabat ngadto sa P46.7 milyones sulod sa siyam ka buwan diin mas dako kini itandi sa P18 milyones sa susamang mga bulan sa niaging tuig.

Sa South Bus Terminal sa niaging tuig naa lang sa P18 milyones ang kita sulod sa siyam ka bulan ug nisaka karon ngadto sa P47.4 milyones.

Apan ang kita sa mga provincial ug district hospitals nikunhod kini og 60.13% gikan sa P289.7 milyones sa tuig 2020 anaa na lang sa P115.5 milyones.

Gitinguha sa Kapitolyo nga makuha o molapas sa P5.5 bilyones nga target collection niini karong tuiga diin sa pagkakaron anaa na sa 71 porsyento sa target collection ang Kapitolyo. BDB (BANATNEWS)