Na-missing nga ginang napalgan sa dagat

CEBU, Philippines — Ginang nga missing sa trahedya sa Tinubdan Falls,Barangay Tabili, Lungsod sa Catmon niadtong Domingo sa gabii nakit-an nang wala nay kinabuhi sa tunga-tunga sa lawod sa Carmen ug Camotes Island, sayo sa buntag kagahapong adlawa (Martes).

Ang ginang nga si Jacel Alastra, giila mismo sa bana niini pinaagi sa singsing nga gisul-ob niini sa dihang gidala kini sa baybayon sa Catmon.

Ang kapulisan sa Carmen nakadawat ug taho nga adunay nakit-an ang mga mananagat ala-una ngadto sa alas dos sa kaadlawon nga usa ka lawas nga nagpalutaw sa kadagatan, hinungdan nakig-alayon gilayon kini sila sa Catmon.

Matud pa ni Konsehal Dan Jusay, mga alas sais sa buntag na nila nakuha ang patay nga lawas ni Alastra.

Gitug-an ni Jusay, layo-layo gayud ang gianoran sa lawas ni Alastra, kinsa maoy unang nadala sa bul-og sa tubig gikan sa falls.

Gibutyag ni Jusay, ang mayor nakigtagbo karon kanila aron mopagawas ug Executive Order nga magmugna og fact finding team para mohimo ug imbestigasyon sa maong trahedya.

Dugang pa ni Jusay, tukion usab nila sa tigum kung unsay ilang mahatag nga ayuda ngadto sa pamilya sa mga nakalas.

Si Jusay kinsa kaniadto maoy mayor sa Catmon mibutyag nga wala niya hatagi og permit kaniadto ang pribadong indibidwal nga ni-develop sa Tinubdan falls tungod kay nakita niyang peligroso kaayo ligoan ang lugar.

Ang fact finding team mosusi  sa panghitabo ug aron sutaon kun unsay kinahanglang buhaton aron di na masubli ang trahedya.

Ang tinubdan sa maong falls gikan sa Naghalin River sa Barangay Cambangcaya  sa tunga-tungang bahin sa Catmon ug Carmen.

Nangaligo ang pamilya sa mga biktima diha sa lugar sa dihang kalit nga nibubo ang bul-og sa tubig dala ang mga putol nga mga kahoy ug mga bato nga nakaingon sa ilang pagkaanod.— IBM (BANATNEWS)