Kampo sa mga Garcia napun-an og mga kaalyado
CEBU, Philippines — Napun-an karon ang alyansa sa kampo sa mga Garcia alang sa umaabot nga 2022 election kini human nga ang mga top official sa tulo ka lungsod ug siyudad sa Probinsiya sa Sugbo ang nagpamiyembro sa One Cebu Party.
Apil sa mga nibalhin sa kampo sa mga Garcia mao sila si Sogod Mayor Richard Streegan ug asawa niini nga si Vice Mayor Lissa Marie “Moonyeen” Durano-Streegan, uban sa mga miyembro sa Sogod municipal council ug 18 pa ka barangay kapitan sa lungsod.
Nanumpa sila isip miyembro sa One Cebu niadtong Septiyembre 23, 2021 ug nisaad nga mosuporta kang Garcia sa umaabot nga piniliay sa sunod tuig.
Si Bise Mayor Moonyeen, ig-agaw ni kanhi tourism secretary Ace Durano ang giingong maoy modagan pagka gobernador sa 2022 election.
Base sa report sa Sugbo News, sa Lungsod sa Carmen, si Mayor Carlo Villamor, Bise Mayor Al Damiles ug tulo ka municipal councilors ang nanumpa usab kang Garcia isip mga bag-ong miyembro sa One Cebu niadtong Septiyembre 23, 202.
Nasayran nga ang maong mga opisyal nisuporta na daan kang Garcia niadtong 2019 election.
Samtang sa Dakbayan sa Toledo, si Mayor Marjorie “Joie” Perales, Vice Mayor Jay Sigue ug municipal councilors Ceasar Ian Zambo, James Gaite, Ricardo Pepito, Amuerfino Perales, Antonio Borja Jr., Ophelio Dolino, Mark Eric Espinosa, Louis Nicholas Espinosa, Edgar Dejito , presidente sa Association of Barangay Captain ug Francis Marvin Prahinog, SK Federation President nanumpa usab kini isip bag-ong mga miyembreo sa One Cebu.
Si Garcia mao ang ni-administer sa ilang pagpanumpa kagahapon diin gisaksihan kini ni third district Congressman ug Deputy Speaker Pablo John Garcia kinsa maoy secretary general sa One Cebu. BDB (BANATNEWS)
- Latest
