Rama ug Garcia mag-tandem sa eleksiyon sunod tuig
CEBU, Philippines — Kompirmado na ang panagpares nila ni Bise Mayor Michael Rama ug Konsehal Raymond Garcia sa umaabot nga piniliay sa sunod tuig.
Nasayran nga si Rama maoy modagan pagka-mayor sa Dakbayan sa Sugbo samtang si Garcia ang iyang running mate.
Mao kini ang resulta sa ilang tigom sa niaging gabii diin pormal usab nga gianunsiyo ang hiniusang pwersa sa tulo ka lokal nga partido dinhi sa Siyudad sa Sugbo nga gilangkuban sa Kugi Uswag Sugbu (KUSUG), BARUG ug Panaghiusa.
Si Rama maoy nangulo sa BARUG samtang si Garcia ang leader sa KUSUG. Magsilbi nila nga campaign manager si kanhi Konsehal Joey Daluz kinsa usa sa mga lider sa Partido Panaghiusa.
Matud ni Rama nga nahan-ay na ang ilang mga kandidato sa duha ka distrito ug ilaha lang kini nga i-anunsiyo sa tukmang panahon.
Sa niaging gabii, gipistahan sa ilang supporters sa social media ang hulagway nga gi-post ni Garcia diin giisa ni Presidential Assistant for the Visayas Secretary Michael Lloyd Dino ang kamot sa mga lider sa tulo ka partido.
Nasayran nga sa tigom sa KUSUG niadtong buwan sa Hunyo nahimong dinapit niini si Rama kinsa nidiskurso niadtong higayona nga usa ra gyud ang ilang kontra.
Giingong gipasumbingay niini ang partido ni kanhi mayor Tomas Osmeña nga Bando Osmeña Pundok Kauswagan (BOPK).
Sa maong tigom usab ginganlan ang opsiyales sa KUSUG nga naglangkub nila ni Garcia isip presidente ; Konsehal Jerry Guardo isip bise presidente sa north district; Cebu City Legal Officer Rey Gealon isip bise presidente sa south district; Konsehal Joel Garganera isip secretary-general; Mayor Edgardo Labella isip deputy secretary-general; Konsehal Niña Mabatid isip auditor; kanhi local school board chairman Raddy Diola isip treasurer; ug kanhi kapitan sa Barangay Apas Ramil Ayuman isip PRO. —BDB (BANATNEWS)
- Latest