Mga namatay sa landslides sa Naga gihandum

CEBU, Philippines — Gihandum sa kagamhanan sa Dakbayan sa Naga ang ika-tulo ka tuig nga kasumaran sa nahitabong landslide diha sa Sindulan, Barangay Tinaan nga mikalas og ubay-ubay nga kinabuhi.

Ang kagamhanan sa Syudad pinangulohan ni mayor Kristine Vannesa Chiong nihalad og responso alang sa mga namatay didto sa Naalad Public Cemetery.

Si Fr. William Alcalde maoy nihatag sa responso samtang mihalad og mga buwak, kandila ug pag-ampo ang mga kawani sa City Disaster Risk Reduction and Management Office (CDRRMO).

Gihangyo sab nila ang mga Nagahanon nga mopahinungod og pag-ampo alang sa mga nangamatay sa maong pagdahili sa yuta sa bukirang bahin sa siyudad.

Kahinomduman mokabat sa 78 ka tawo ang nangamatay human matabuni sa midahili nga yuta ang ilang mga panimay tulo ka tuig na ang nakalabay.

Hinuon ang naluwas sa maong insidente gitagaan og ayuda ingon man kapuy-an samtang hinay-hinay nga nibangon sa makalilisang nga trahedya. —MEL (BANATNEWS)