Super Typhoon Rosal nisulod na sa PAR

CEBU, Philippines — Giisa ang Tropical Cyclone Wind Signal No. 1 sa lima ka mga lugar sa Luzon human nisulod na ang Super Typhoon Champi sa  Philippine Area of Responsibility (PAR) ug gitawag na kini karong bagyong Rosal,  sumala pa sa PAGASA kagahapon sa hapon. Ang bagyong Rosal nisulod sa PAR  alas 10:40 a.m. kagahapon October 20 ug kataposan kining nasigpatan sa alas 11 sa buntag nga bulletin kagahapon, naa sa 1,385 kilometros sa sidlakang bahin sa Central Luzon. Nagdala kini og maximum sustained winds nga 185 kilometers per hour duol sa tunga ug haguros nga 230 kph.

Matud pa sa PAGASA nagdala kini og strong to typhoon-force winds  nga masinati hangtud 720 kilometers gikan sa sentro. Nag-irog ang bagyong Rosal west-northwestward sa gipaspason nga 25 kph. Samtang wala kaayo maapektahi ang kabisay-an, giisa ang Signal No. 1 sa Luzon partikular sa Batanes, sidlakang bahin sa Babuyan Islands (Babuyan Island, Camiguin Island, Didicas Island), sidlakang bahin sa mainland Cagayan (Santa Ana, Gonzaga, Lal-Lo, Santa Teresita, Camalaniugan, Aparri, Buguey, Gattaran, Baggao, Peñablanca), northeastern portion sa Isabela (Maconacon, Divilacan, Palanan, San Pablo, Cabagan, Santa Maria, Tumauini, Ilagan City) ug northeastern portion sa Catanduanes (Pandan, Bagamanoc, Panganiban, Viga, Gigmoto). Gipahimangnoan ang mga residente sa maong mga lugar nga makasinati sila og hangin gikan 39 hangtud 61 kph  sa mosunod nga 36 ka oras.

Makamugna sab og kusog nga hapos sa hangin sa pipila ka bahin sa Luzon, Visayas ug Mindanao tungod sa hanging amihan.

Karong adlawa, Miyerkules, Oktobre 21  gipaabot nga moirog ang Rosal west-northwestward dayun sa Biyernes sa buntag moirog kini northwestward.- IBM BANAT NEWS