CEBU, Philippines — Kapin sa siyam ka bulan human kini nadawat nagpabiling wala magamit ang 1,000 ka tablet computer nga adunay kinatibuk-ang kantidad nga P28.25 milyones sa Cebu Normal University (CNU) tungod sa kalangan sa pagkompleto sa P948 milyones Centralized Student Smart Hub Project,matud sa Commission on Audit (COA).
Matud sa COA nga ang mga tablet nga Apple iPad 10th generation nga adunay 64GB nga storage matag usa gi-deliver ug gidawat sa unibersidad niadtong Mayo 14, 2025, apan wala pa magamit tungod kay wala pa mahuman ang smart e-library ug ang mga kalambigit nga construction works.
Gibutang ang mga tablet sa Tandang Sora function hall sa unibersidad diin gitipigan usab ang ubang mga kagamitan sama sa 75-inch interactive display boards ug network cameras.
Gipasidan-an sa COA nga ang dugay nga pagtipig sa mga kagamitan mahimong mosangpot sa kadaot, pagkawala ug pagkausab sa teknolohiya nga mahimong makapahimo niini nga dili na angay gamiton.
Mahimong maapektohan usab ang warranty niini tungod kay ang usa ka tuig nga warranty nagsugod sa petsa sa pag-deliver ug pagdawat.
Ang maong proyekto nga adunay kontrata nga P947,831,750 gituyo aron makahatag og smart classrooms, electronic laboratories, e-library, learning management system ug uban pa’ng information and communications technology facilities.
Sa report, niadtong Pebrero 24, 2026, ang proyekto aduna lang kini accomplishment rate nga 34.29 porsiyento.
Ang Board of Regents kaniadto naghatag og dugang panahon ug nagsuspende sa trabaho pinaagi sa Resolutions No. 150 ug 152, series of 2025, taliwala sa mga kalangan, linog sa amihanang Sugbo niadtong Septiyembre 30, 2025 ug pending clearance gikan sa Office of the Building Official.
Nakita usab sa COA ang kakulang sa dokumentasyon sa pag-apod-apod sa 280 ka Apple MacBook Air M2 laptops nga adunay kinatibuk-ang kantidad nga P22.05 milyones.
Sa maong gidaghanon, 139 lang ang adunay Property Acknowledgment Receipts (PARs) samtang ang nahibiling 141 ka laptop giapod-apod nga walay gikinahanglang dokumento.
Gipangutana usab sa COA ang proseso sa procurement sa proyekto nga gikontrata ngadto sa Supplier A niadtong Oktubre 1, 2024 ubos sa 2016 Revised Implementing Rules and Regulations sa Republic Act No. 9184 o Government Procurement Reform Act.
Matud sa mga auditor nga ang bidding documents nga gipatik sa Philippine Government Electronic Procurement System wala maglakip sa mga plano ug drawing alang sa pag-usab sa naandang mga classroom ngadto sa smart classrooms ug electronic laboratories.
Apan matud sa Bids and Awards Committee (BAC) nga dili mandatory ang detalyadong engineering designs tungod kay gi-classify ang proyekto isip procurement of goods.
Matud niini nga gisusi usab sa Department of Information and Communications Technology ang terms of reference ug nakitang nahiuyon kini sa Information System Strategic Plan sa unibersidad. BDB BANAT NEWS