Gipusil patay

CEBU, Philippines — Usa ka 28-anyos nga lalaki ang gipusil-patay sa duha ka mga mamumuno diha sa dalan V. Rama Avenue, Sitio Melonida, Barangay Calamba, dakbayan sa Sugbo niadtong Miyerkules sa hapon, Disyembre 17.

Giila ang biktima nga si John Arthur Palao, residente sa Sitio Kawayan, Barangay Sambag II, dakbayan sa Sugbo.

Base sa inisyal nga imbestigasyon sa Cebu City Police Office (CCPO), pasado alas 2 sa hapon, naglakaw si Palao atubangan sa pawnshop sa may V. Rama sa dihang gibanhigan siya sa duha ka armadong tawo.

Si Police Lieutenant Colonel Jose Los Baños, information officer sa CCPO, nibutyag nga padulong unta ang biktima aron makigkita sa usa ka tawo, apan giatangan kini sa duha ka mga mamumuno nga nagpasalipud usa ka poste.

Sa paglabay sa biktima maong poste, kalit siyang gipaulanan og bala.

“While naglakaw ang biktima para naa siya’y i-meet na tao ba naay nanawag niya. Nikalit ‘to og gawas ang mga suspek ug gipusil siya dayon,” sigon ni Los Baños sa Banat News kagahapon.

Gikatahong gipusil sa mga suspek si Palao sa makadaghang higayon sa likod ug daling misibat palayo.

Ang biktima daling gidala sa Cebu City Medical Center (CCMC), diin gideklarar kini nga dead on arrival.

Ang Sawang Calero Police Station 6 sa CCPO nihimo og follow-up operation ug nisusi sa closed-circuit television (CCTV) footage nga naglibot sa crime scene.

Apan base sa CCTV footage, positibong giila sa mga testigos ang usa sa duha nga mamumuno nga mao si Rosmar Manceniro, kinsa nagsul-ob og pula nga t-shirt, ug ang iyang kauban nga wala pa mailhi.

“Identified naman ang suspek, pero ang gi-follow up sa mga tropa sa pagkuan sa iya whereabouts kay nisibat man,” matud niya.

Wala pa matino sa kapolisan kun unsay motibo nganong gipatay ang biktima.

Dugang pa niya nga wala pa sila masayod sa background ug mga kalambigitan sa biktima nga mao untay mahinungdanong ebidensiya aron mas mapadali ang imbestigasyon.