Pinusilay: Usa patay

CEBU, Philippines — Nisangpot sa pinusilay ang pagresponde sa kapulisan sa Lungsod sa Argao sa tawag usa ka concerned citizen labot sa tawong nagpasalba og armas diha sa Barangay Jampang, Lungsod sa Argao pasado alas 12 sa udto kagahapon, Mayo 27, 2025 diin usa ang patay.

Ang nagpasalba og matud pa armas mao si Teodulo Zamora Remolino Jr., nagpuyo sa maong dapit. Si Remolino Jr., sumala pa sa kapolisan miyembro sa Comaling Gun For Hire Group.  Sa impormasyon sa Argao Municipal Police Station Cebu Police Provincial Office (CPPO) dunay nanawag sa ilahang buhatan nga si Remolino nagpasalba og armas duol sa pinuy-anan niini sa Barangay Jampang.

Ang intelligence personnel sa Argao Municipal Police Station uban ang ilang hepe Police Major Janus Giangan niresponde sa maong insidente ug ilahang naabtan ang suspek nga nagbitbit pa og armas mao nga ilaha kining gisitar ug gimandoan sa pagtahan.

Apan inay motahan giingong gipusil niini ang mga polis hinungdan nga kini napusilan. Gidala kini sa Isidro C. Kintanar Memorial Hospital apan gideklarar kining dead-on-arrival sa nag-atiman nga doktor.

Na-recover sa crime scene ang usa ka .9mm pistol nga wala'y serial number, usa ka magazine, upat ka cartridges ug upat ka fired cartridges.  IBM BANAT NEWS