Operation baklas gisugdan

CEBU, Philippines — Mikabat ngadto sa 181 ka mga nagkadaiyang tarpaulin ang gipanglangkat sa mga sakop sa Commission on Elections atol sa dungan nga Operation Baklas diha sa dakbayan sa Carcar sugod kagahapon Pebrero 11, 2025.

Ang mga sakop sa Comelec sa Carcar nga gipangulohan sa Election Officer Omar Sharif Mamalinta ang nipahigayon sa National Synchronized operation baklas subay sa pagsugod usab sa unang adlaw sa kampanya sa National Candidates.

Kauban sa Comelec Carcar ang City Prosecutors, DPWH, DENR, PNP, DILG ug CCENRO sa pagpahigayon sa maong kalihukan nga hugot usab nga gipasalamatan ni Mamalinta.

Sumala pa ni Mamalinta, malinawon ra ang unang adlaw sa pagpahigayon sa nationwide operation baklas ug dili ra usab daghan kaayo ang mga gipantangtang.

Dako ang pagtuo ni Mamalinta nga nagmatngon na ang katawhan kay dili man kaayo daghan ilang gitangtang ug kadaghanan sa mga tarp nahimutang diha sa highway sa may Barangay Perrelos.

Ang mga tarpaulin nga gipangtangtang gipahimutang kini kasagaran diha sa mga kahoy ug lamp post nga gidli sa comelec.

Samtang nagpahigayon usab og Oplan Baklas ang nagkadaiyang ahensya sa gobyerno sa Dakbayan sa Talisay. Kini pinangulohan sa Commission on Election (COMELEC) sa Talisay uban sa Bureau of Fire and Protection (BFP), Department of Environment and Natural Resources (DENR), Department of Public Works and Highways (DPWH), Armed Forces of the Philippines (AFP) ug Philippine National Police (PNP).

Giuna nila sa pag agi ang mga dagkung karsada sama sa Cebu South Coastal Road (CSCR).

Ang Oplan Baklas sa comelec gihimo kini nga dungan sa nagkalain-laing buhatan sa comelec sa matag LGU.

Sila ang mopahibawo sa mga politiko sa ilang campaign posters nga angay ba tangtangon o dili.

Kung nakita nila nga angay nga tangtangon unya ang politiko wala molihok sila na ang motangtang niini. (BANAT NEWS)