CEBU, Philippines — Mayor Gerald Anthony Samsam Gullas sa Dakbayan sa Talisay nimando karon sa kapulisan sa pagsusi sa nag trending karon nga video nga gi-post sa netizens sa karambola sa usa ka imnanan nga nahimutang sa may Barangay Poblacion Talisay City.
Ang post sa netizens diin makita ang karambola sa pundok sa pipila ka mga tawo nga giingong nagsinukmagay niani og 266 comments, 483 emoticons, 657shares ug 64k views diin niabot ang video ngadto sa 28seconds nga adunay caption ang mga Isog sa Talisay City.
Ang maong video niabot na ngadto kang Gullas ug iyaha na usab gipahibalo niini ang kwerpo sa kapulisan nga gipangulohan ni PLT. Col. Wayne Magbanua ang hepe sa Talisay City Police Station.
Sumala pa ni Gullas, kinahanglan mohimo og imbestigasyon ang kapulisan tungod kay dili siya gusto nga maanad ang mga tawo nga maghimo og kasamok sa siyudad nga dili manubag sa ilang gihimo.
Ang kapulisan padayon pa usab nisusi sa maong insidente lakip na usab sa pag-ila sa mga nalambigit niini sanglit wala kini ma blotter sa kapulisan.
Suway usab nga gikuha og habig sa Banat News ang nag-post sa maong video apan wala pa kini motubag sa mensahe nga gipadangat ning tigbalita. — /IBM (BANAT NEWS)