CEBU, Philippines — Ang konseho sa Dakbayan sa Sugbo nisugyot nga hatagan og tukmang adlaw sa paghuman sa ilang trabaho ang tukoron nga technical working group alang sa paghimo og mga gabion dam diha sa mga sapa sa Metro Cebu.
Ang konseho sa siyudad niduso og ordinansahon kabahin sa maong proyekto.
Kini ang tipik sa committee report sa committee on environmental, natural resource, energy ug uban nga utilities atol sa regular session sa konseho niadtong Miyerkules.
Matud ni Konsehal Joel Garganera, chairman sa nahisgutang komitiba nga bisan og nalatid sa ordinansahon ni Konsehal Nestor Archival ang buhaton sa TWG kinahanglang hatagan sila og panahon kung kanos-a nila maduso ang tanan sama sa construction design, feasibility study ug uban pa.
Ang maong ordinansahon gipangamahanan ni Archival kinsa nipadayag sa iyang kahingawa sa krisis sa tubig.
Matud ni Archival nga ang gabion dam matigom niini ang tubig sa kasapaan nga mahimong dugang tinubdan sa tubig ug makatabang usab kini sa dili pagdahili sa yuta ug mga pagbaha.
Ang konseho nagkasinabot nga kinahanglan ang pagtuon ug kaalam aron mahimong epektibo ang pagpamutang sa mga dam.
Ang mga sapa nga gituki sa maong ordinansahon naglangkub sa Cotcot, Mananga, Lahug, Butuanon, Kamputhaw, Subangdaku ug Guadalupe. BDB BANAT NEWS