CEBU, Philippines — Tulo ka mga trabahante sa Lapu-lapu City Disaster Risk Reduction and Management Office ang gikatahong napositibo sa illegal nga drugas atol sa surprise drug test nga gihimo niadtong Disyembre 28 sa DRRMO Office sa Barangay Gun-ob, kini ang gibutyag sa pangulo sa CLOSAP nga si Garry Lao.
Matud pa ni Lao, adunay 118 ka mga trabahante sa LLDRMO apan ang 115 lang ang napaubos sa drug test tungod kay ang tulo atua sa isla kay nitubag og emerhensiya. Si Lao, nitug-an napahibalo na niya ang pangulo sa LLDRRMO nga si Nagiel Banacia may kalabutan sa resulta sa drug test ug kini nipadayag naa na kini sa Human Resource Development Office alang sa ipahamtang nga silot batuk kanila.
Gipugngan ni Lao ang pangalan sa maong empleyado tungod kay ipaubos pa sila sa confirmatory test.
Gibutyag ni Lao, gipahugtan nila ang kampanya aron sa pag-establisar sa drug-free workplace sa Lapu-Lapu City Hall. (BANAT NEWS)