CEBU, Philippines — Napalgang wala nay kinabuhi ang usa ka lalaki nga tupad sa iyang motorsiklo sa kimba sa daplin sa kalsada sa Brgy. Bala-as, Argao niadtong Sabado sa gabii Septiyembre 2, 2023.
Ang patay’ng lawas giila nga si Jarmztone Eben y Marciano, 34, adunay live-in partner, trabahante sa usa ka sari-sari store ug residente sa Sitio Bayabas, Brgy., Cansuje sa maong lungsod.
Matud pa sa kapolisan sa Argao adunay nitaho sa ilang buhatan nga adunay nakit-ang motorsiklo ubos sa kimba sa kilid sa karsada ug dunay tawo nagbuy-od sa tupad niini.
Atol sa pagsusi sa kapolisan, nasuta nga adunay skid mark sa karsada padung sa nahimutangang kimba sa namatay.
Paghiling sa lawas niini, aduna kini samad sa likod nga bahin sa iyang ulo.
Nagduda ang kapolisan nga naaksidente kini ug nabunal ang ulo sa semento. Gidala na ang lawas niini sa Isidro Kintanar Memorial Hospital (ICKMH) sa maong lungsod aron masuta ang hinungdan sa kamatayon sa biktima. — /IBM (BANAT NEWS)