CEBU, Philippines — Ang pagbaton og dekalidad nga edukasyon ngadto sa mga tinun-an nga nagtungha sa mga publikong tunghaan sa Siyudad sa Mandaue maoy nag-una sa gituki nila ni Mayor Jonas Cortes uban sa kadagkoan sa Department of Education (DepEd) ug mga principal sa ilang panagtigom nga gihimo diha sa iyang buhatan niadtong niaging adlaw.
Atol sa gipahigayong tigom gisugyot ni Cortes ang sa pagpalambo sa dekalidad nga edukasyon sa mga kabataan nga nagtungha sa mga publikong tulunghaan diha sa kabarangayan.
Gipadayag usab niya ang iyang tinguha nga pagpatukod og daghang school buildings tungod kay nagkadaghan na usab ang mga tinun-an sa siyudad. Gitinguha usab ni Cortes nga daghan ang klase sa adlawan aron kalikayan ang klase sa panahon sa gabii tungod kay risgo kini sa siguridad sa mga estudyante.
Dugang pa sa mao niyang tinguha mao ang paghatag og dugang libre nga training seminars sa mga magtutudlo alang sa pagkat-on sa dekalidad nga edukasyon. (BANAT NEWS)