CEBU, Philippines — Ang Mainit Spring Swimming Pool sa Lungsod sa Oslob temporaryo nga gisirad-an kagahapon aron ayohon ang maong lugar.
Ang tourism office page sa Lungsod sa Oslob nipahibawo ngadto sa publiko kasamtangan nilang gisirado ang Mainit Spring Swimming pool alang sa pag-ayo ug renovation sa lugar.
Wala pa’y tukmang panahon nga gipadayag ang lungsod hangtud kanos-a mahuman ang pag-ayo sa lugar alang sa subling pagbukas niini.
Ang kadagkoan sa tourism sa lungsod niawhag sa publiko sa pagsabot tungod kay alang usab sa kaluwasan sa tanan ang maong proyekto ug nangayo usab sila og pasaylo sa kahasol nga dala niini.
Ang tourism office sa lungsod nibutyag nga ilaha ra usab unya nga ipahibalo sa publiko ang petsa sa pagbukas na usab unya niini diin mahimo ra usab motawag ang adunay mga pangutana sa buhtan sa mga numero sa telepono 032-3441757. Nasayran nga niadtong Hunyo 14, 2023 gisiradohan usab ang Tumalog Falls alang sa general clean up nga gipahigayon sa mao nga adlaw ug gibuksan usab dayton kini human sa gipahigayon nga kalihokan. (BANAT NEWS)