CEBU, Philippines — Usa ka 38-anyos nga mabdos sikop atol sa gipahigayong buy-bust operation sa mga sakop sa Drug Enforcement Unit niadtong Martes sa gabii diha sa Barangay Suba, Dakbayan sa Sugbo.
Ang nasikop mao si Jo-ann Mae Estellore, minyo, walay, trabaho ug residente sa maong barangay.
Nasakmit gikan kang Estellore ang 10 gramos nga shabu nga nibalor tanan ngadto sa P68 mil ug buy-bust money.
Atol sa maong operasyon nasikop usab ang bana niini nga si Pablo Estellore, 41-anyos, usa ka vendor.
Si Pablo giingong nasakmitan usab kini og pipila ka putos nga shabu.
Ang mga suspetsado giingong mga bag-o nga drug player diha sa lugar.
Ang mga suspetsado nagkanayon nga napugos sila sa pagsulod sa pagpaninda og shabu tungod sa kalisod sa ilang panginabuhian ug manganakay usab si Mae.
Sa laing bahin, tulo ka suspetsadong pusher og shabu ug 11 ka sugarol ang nasikop atol sa usa ka adlaw nga operasyon sa kapolisan sa Lungsod sa Cordova.
Si Police Major Michael Gingoyon, hepe sa Cordova Police Station nagkanayon nga ang ilang operasyon gipahigayon niadtong adlaw’ng Martes.
Nasakmit sa kapolisan sa lungsod gikan sa tulo ka pusher ang 40 gramos nga shabu nga nagkantidad tanan ngadto sa P272,000.
Samtang sa ilegal nga sugal, nasakmit sa kapolisan ang gambling parahernalia sa ilegal nga suwetres ug nasakmit usab nila ang mga ebidsensiya nga nagakip sa kwarta nga nagkantidad og P5,066.
Ang mga suspetsado gitanggong karon sa detention cell sa Cordova Police Station. — Romeo T. Limpangog, BDB (BANATNEWS)