CEBU, Philippines — Ang Dyninno ug Conduent mikadlit sa ikaduha nilang sagunson nga daog sa labing unang Hoop Nation Inter-BPO League nga gipaluyohan sa Hype Pro Power Drink didto sa City Sports Club-Cebu gym.
Ang Dyninno nakaipsot batok sa Optum, 52-48, samtang ang Conduent nag-agi pa og overtime sa wala pa tumbaha ang Iploy, 80-75.
Si JL Segarra ang mibida sa Dyninno uban ang 16 puntos, pito ka rebounds ug duha ka assists samtang si Wilkins Lapingcao maoy nangu sa Conduent human miposa og unom ka tres sa iyang 24 puntos nga iyang gipalamanan og duha ka steals.
Sa laing bahin, ang FS United ug Techma Cebu Rockstar parehong daogan nga misikad sa ilang kampanya.
Si Millineo Leo Rojas mipupo og 16 puntos, lima ka assists ug duha ka steals sa dihang gibugha sa FS United ang TDCX, 60-46, samtang si Fahad Villafranca mitali og 13 puntos, unom ka rebounds ug usa ka steals aron tabangan ang Techma pagpakgang sa Amazon, 54-51.
Sa ubang mga resulta, si Joselito Dumangcas miharos og 20 puntos, 11 ka rebounds ug lima ka steals sa dihang gipiog sa Homesourced Inc. ang Newfold Wolves, 59-56, samtang si Archel Arena mihipos og 12 puntos, unom ka rebounds ug usa ka block aron ituboy ang Synchrony ngadto sa 49-37 nga paglampornas sa Omega Healthcare.