CEBU, Philippines — Nasakmit ang kapolisan sa managlahing mga anti-drug operations ang gibabanang dul-an P12 milyones nga shabu sa gipahigayong Simultaneous Anti Criminality Law Enforcement Operation (SACLEO} Miyerkules sa gabii, Marso 29, 2023.
Si Police Colonel Elmer Lim, director sa LCPO miingon nga ilang nadakpan ang HVI nga pusher nga giila nga mao si Ramelo Carungay Aguitong alyas Ramil, 40, lumad nga taga Dalaguete.
Nadakpan siya sa buy bust operation diha sa Sitio Seabreeze, Barangay Pusok, Dakbayan sa Lapu-Lapu ug nasakmit ang kapin usa ka kilong gituohang shabu nga nagkantidad og P7. 14 milyones.
Si Lim miingon nga ang pagkasikop ni Aguitong maoy resulta sa follow up operation sa unang buy bust operation nga ilang gihimo sa Sitio Seaside sa Barangay Pusok sa maong dakbayan. Matud ni Lim 15 ka putos nga Chinese Green Tea Bags ang gisudlan sa maong mga drugas.
Laing giila nga High Value Individual nga pusher ang nadakpan usab sa kapolisan sa MCPO sa operasyong gipangulohan nilang Police Lieutenants Troy John Lalamunan ug Erwin Remegio sa Mandaue City Drug Enforcement Unit.
Ang dinakpan mao si Allan Redoble Sabac Jr., alyas Nano, 38, taga Barangay Poblacion West sa Lungsod sa Moalboal. Giingong nakuhaan kini og 110 gramo nga gituohang shabu nga mokantidad og P748 mil. Sa Talisay City, P3.4M sab nga kantidad sa gituohang shabu ang nasakmit sa mga sakop sa Provincial Intelligence Unit (PIU) sa Cebu Police Provincial Office didto sa Purok Orange, Barangay Lawaan 3, Dakbayan sa Talisay nianang gabhiuna.
Ang dinakpan mao si Roque Planquero Damos alyas Oking, 40, usa ka welder nga taga Sitio Sapang Communidad, Barangay Guadalupe, sa Siyudad sa Sugbo. Sila si Police Captain Michael Sevilla maoy nakasakop sa suspek nga nibaligya og ilegal nga drugas. Nakuha gikan sa suspek ang 500 gramong gituohang shabu nga gibana-banang mobalor og P3.4 milyones.
Sa laing bahin, giguba sa mga operatiba sa Philippine Drug Enforcement Agency Negros Oriental Provincial Office ug Regional Intelligence Unit-7 ang usa ka drug den ug tulo ang nadakpan sa buy-bust operation nga gipahigayon diha sa Zone 4, Barangay Looc, Dumaguete City, Negros Oriental niadtong Miyerkules sa gabie.
Ang nadakpan sa buy-bust operation mao ang subject sa operasyon ug tig maintain sa drug den nga si Al Pracio alyas Alo, 27, wala'y trabaho.
Nadakpan sab ang duha ka tig-adtuan sa drug den nga sila si Bharru Bhon Rafales, 25, ug Lemuel Pagbonocan, 28, pulos wala'y trabaho. Nakompiskar sa buy-bust operation ang lima ka paketeng gituohang shabu nga motimbang og 13 gramos nga mobalor og dul-an sa P90 mil, buy-bust money ug drug paraphernalia.
Ang mga nadakpan sa maong mga operasyon pasakaan og kalapasan sa Sections 5, 6, 7, 11, ug 12 Article II sa Republic Act 9165. —Rowena Capistrano, Gabriel Bonjoc, Decemay P. Padilla (BANATNEWS)