CEBU, Philippines — Susihon ni Cebu City Mayor Michael Rama ang posibleng paglakip sa mga job order sa service incentives o charter day bonus human ang giaprobahan nga supplemental budget sa city council niadtong Miyerkules alang ra kini sa mga regular ug casual nga kawani.
Si Konsehal Noel Wenceslao nagkanayon nga ang kinatibuk-ang kantidad nga P67,589,480.00 alang sa general fund naaprobahan sa niaging adlaw diin ang P62 milyones niini gigahin alang sa bonus sa mga empleyado samtang ang nahibilin nga kantidad alang sa reimbursement sa lain-laing departamento.
Adunay kapin sa 5,000 ka regular ug casual nga mga empleyado ang Cebu City Hall.
“Only the regular and casual employees ang entitled atong sa service incentives”, matud ni Wenceslao. Matag regular ug casual nga empleyado makadawat og P15 mil matag usa.
Nasayran nga sa niaging tuig adunay nadawat nga incentives ang mga job order.
"Yes as far as JO’s wala gyud sila ana nga amount, but I will check on how far we can go nga kapangitaan og money. And I will check how they are appreciated by the local finance”, padayag ni Rama.
Matud ni Rama nga makig-estorya usab siya sa local finance team kalabot niini.
“Ako sad sila pahinumduman nga di na ta magbalik-balik nga kong maghisgot na tag bonus, apil nana sa ilang discussion ang JOs”, dugang ni Rama . — Caecent No-ot Magsumbol, Rowena D. Capistrano (BANATNEWS)