CEBU, Philippines — Gilaoman nga sa daling panahon hingpit na nga mahiusa ang canyoneering activities sa Lungsod sa Badian ug Alegria.
Subay kini sa tinguha sa Probinsiya sa Sugbo nga adunay “harmonization” sa maong extreme activity sa duha ka lungsod.
Ang mga mayor sa nahisgutang mga lungsod Carmencita Lumain sa Badian ug Gilberto Magallon sa Alegria ang niuyon niini ug nangayo na lang sa pagtugot sa tagsa-tagsa ka konseho aron makasulod og pormal nga kasabotan.
Lakip sa pasiunang nasabutan mao nga kinahanglang ang duha ka lungsod mosunod sa “uniform rate” sa canyoneering nga P1,500 matag turista.
Samtang sa Lungsod sa Tabogon andam na sa pagdagsa sa mga bisita nga lokal ug langyaw niining panahon summer.
Matud ni Mercedette Toling, municipal tourism officer sa lungsod nga bag-o lang sila nagpahigayon og surprise ocular inspection sa coastal resorts diin nanghatag sila og mga updated nga emergency numbers ug ilang gituki ang safety measure protocols uban sa Coastguard ug MDRRM personnel.
Ang mga resort sa lungsod giawhag sa paglimpyo sa ilang vicinity ug pag-update sa ilang mga first aid medical equipment ug lakip usab ang pag-obserbar sa protocols.
Matud ni toling nga aduna sila’y tourist spots nga ikatanyag sa mga bisita sama sa turtle watching, camping, kayaking, intense hiking ug ang naila na nga Guiwanon Spring. —Rowena D. Capistrano (BANATNEWS)